Tags-Sad

rañj hai dard hai udāsī hai
zindagī har tarah mukammal hai

baat niklegī to phir duur talak jā.egī
log be-vaj.h udāsī kā sabab pūchheñge

ye maiñ hī huuñ jo udāsī nikāltā huuñ tirī
har ik fasīl meñ lāzim nahīñ ki rauzan ho

nahīñ kuchh tere baa.is ye udāsī bad-gumāñ mat ho
jahāñ jaatā huuñ mere saath ye tanhā.ī jaatī hai

nashāt-āvar hai ye udāsī kā ek uḌtā huā sā lamha
mabādā tāq-e-rajā ho vīrāñ sharāra ik chashm-e-tar meñ rakh de

sahelī hai mirī barsoñ purānī
udāsī mujh ko ḳhush aane lagī hai

vahī be-vaj.h udāsī vahī be-nām ḳhalish
rāh-o-rasm-e-dil-e-nākām se jī Dartā hai

udāsī baat kartī hai kisī anjān bolī meñ
sukūñ kā phuul dil ke shāḳhchoñ se toḌ letī hai

rahtī hai mire kamre meñ kui tiira udāsī
ai sho.ala badan bhej sharāra sī koī shaam

is se pahle udāsī chhā jaa.e
maiñ ḳhushī kī ḳhabar se miltā huuñ

tasavvur meñ Tahalte ḳhāl-o-ḳhad kyā chāhte haiñ
udāsī se kaho tasvīr kī āñkhoñ se pūchhe

ai udāsī kī fazāoñ ke parinde ye batā
apne anfās ke tārīk bayābānoñ meñ

mujh meñ haiñ gahrī udāsī ke jarāsīm is qadar
maiñ tujhe bhī is maraz meñ mubtalā kar jā.ūñgā

tirī puujā ko aayā hai zamāna
tirī ye ek udāsī dekhne ko

unheñ aane do mere aa.ine tak
jo aa.e haiñ udāsī dekhne ko

saath ho tum bhī mire saath hai tanhā.ī bhī
kaun se dil se kise vaj.h-e-udāsī likkhūñ

shaam kahtī hai koī baat judā sī likkhūñ
dil kā isrār hai phir us kī udāsī likkhūñ

un darīchoñ se ki jo the hī nahīñ
ik udāsī hai ki dar aa.ī hai

udāsī ruuh se guzrī hai is tarah jaise
ujaaḌ dasht meñ patjhaḌ kī dopahar tanhā

kaisī hotī haiñ udāsī kī jaḌeñ
aa dikhā.ūñ tujhe dil ke reshe