Tags-Safar

nāgāh jaise bichhḌā huā ham-safar mile
ġham mil gayā to dil ko baḌī tāzgī milī

na jaane kaun sī manzil ko le chale ham ko
vo ham-safar jo haqīqat meñ ham-safar bhī nahīñ

sukūñ ke saath thakan bhī hai us kī yādoñ meñ
guzishta umr hai bhūle hue safar kī tarah

sa.ūbatoñ meñ safar kī kabhī jo niiñd aa.ī
mire badan kī thakan ne uThā diyā hai mujhe

ḳhvāb ke rath jis jagah hotā hai bādal par safar
aaj shab le jā mujhe tū un jahānoñ meñ kahīñ

ye tishnagī kā safar kaT gayā hai jis ke tufail
vo dasht dasht chhalaktā sarāb sā kyā thā

mirā yaqīñ hai ki rāh-e-vafā meñ mere ba.ad
mirā safar tire qadmoñ ne tai kiyā hogā

maiñ ruk sakūñgā Thahar sakūñgā thakan safar kī miTā sakūñgā
kahīñ to koī shajar milegā tamām raste yahī yaqīñ thā

mile jo us se to yādoñ ke par nikal aa.e
is ik maqām pe kitne safar nikal aa.e

vaise us tārīk jañgal ke safar ke qabl bhī
haath meñ us ke

hameñ to khīñch rahā thā safar tirī jānib
bas is jahāñ kī rivāyat meñ rah ga.e haiñ ham

tumhāre paañv ke nīche kahīñ zamīñ hī nahīñ
safar kā kar ke tū kaise irāda baiThā hai

safar meñ hotī hai pahchān kaun kaisā hai
ye aarzū thī mire saath tū safar kartā

use to ye ijāzat thī vo jab chāhe palaT jaa.e
safar merā to baaqī thā mujhe to yūñhī chalnā thā

safar meñ raah ke āshob se na Dar jaanā
paḌe jo aag kā dariyā to paar kar jaanā

matā-e-dard numū ke safar meñ hai shāmil
kalī bahār meñ vaise jalī nahīñ jaatī

in mausamoñ kī raah meñ yuuñ be-ḳhabar na baiTh
rahtā hai kaun kaun safar par bhī dekh le

ishāre kar rahā hai dūriyoñ kā khaultā sāgar
mujhe har shaam ik andhā safar vāpas bulātā hai

baḌh ga.e haiñ is qadar qalb o nazar ke fāsle
saath ho kar ham-safar se ham-safar milte nahīñ

rāste raushan haiñ āsār-e-safar ma.adūm haiñ
bastiyāñ maujūd haiñ dīvār-o-dar milte nahīñ