Tags-Andhera

chāñd niklā nahīñ tū bhī nahīñ dikhtā ab to
raat hai maiñ huuñ añdherā hai ye tanhā.ī hai

baḌā latīf añdherā hai raushnī na jalā
urūs-e-shab ko abhī ḳhush-libās rahne de

gharoñ meñ chāroñ taraf qumqume to raushan haiñ
magar diloñ se añdherā nahīñ nikaltā hai

yahāñ Duubī huī thī ādamiyat ghup añdheroñ meñ
jahālat kā añdherā thā tirī tanvīr se pahle

ye kaisī raushnī hai aur kin rāhoñ se aa.ī hai
yakāyak merī āñkhoñ meñ añdherā kyuuñ huā hai

ye bujhe bujhe sitāre ye dhuāñ dhuāñ saverā
kahīñ aabrū ko Das le na ye bāvlā añdherā

dar-e-dil par abhī dastak na denā
añdherā hai ujāle so rahe haiñ

aTak rahā thā añdherā sāñsoñ meñ ḳhauf ḳhuuñ meñ gilā huā thā
ai sub.h-e-kāzib jo chhoḌ kar zinda shab Talī hai bahut bhalī hai

chahār jānib ye be-yaqīnī kā ghup añdherā
ye merī vahshat kā inḳhilā hai ḳhalā nahīñ hai

sūraj ne dhuul kirnoñ kī āñkhoñ meñ jhoñk dī
mat pūchh raushnī ne añdherā kiyā bahut

ai ġham-e-zīst bulātī haiñ mahaktī zulfeñ
aaj kī raat ye pur-nūr añdherā hī sahī

chhup gayā chāñd añdherā hai bharī mahfil meñ
tum mire dil meñ utar jaao ujāloñ meñ raho

qismat ke khilaune haiñ ujālā ki añdherā
dil sho.ala-talab thā so bahar-hāl jalī huuñ

apnī anjuman se ham ye kahāñ chale aa.e
har taraf añdherā hai har taraf udāsī hai

kahāñ kahāñ pe jalā.ūñ dil-o-nazar ke charāġh
har ek ghar meñ añdherā dikhā.ī detā hai

kis qayāmat kā na jaane vo añdherā hogā
jis ne ḳhurshīd-e-jahāñ-tāb ko gherā hogā

so.e hue zehnoñ meñ nādīda saverā hai
sūraj ke bhī ugne par har samt añdherā hai

hue haiñ band dishāoñ ke saare raste aa
añdherā chhāne lagā lauT kar parinde aa

ghup añdherā hai mere chāroñ-or
is meñ thoḌī sī raushnī kyā hai

ġhulām gardish meñ hai añdherā hai dam-ba-ḳhud surḳh sā saverā
kafan pahan kar nikal chuke haiñ ġharīb 'bāqar' navāb-raushan