Tags-Andhera

hameñ ḳhabar hai ki ham haiñ charāg-e-āḳhir-e-shab
hamāre ba.ad añdherā nahīñ ujālā hai

is ke bā-vasf ki har samt añdherā hai muhīt
ham haiñ vo log jo ummīd-e-sahar rakhte haiñ

bahut dinoñ se chhupā hai vo chāñd jaane kahāñ
bahut dinoñ se añdherā hai dil kī rāhoñ meñ

abhī tavaqqo.a banā.e rakhnā abhī umīdeñ jagā.e rahnā
bahut ghanā hai añdherā shab kā diloñ kī sham.eñ jalā.e rahnā

añdherā un ke gharoñ kā bahut bhayānak hai
tamām shahr meñ jin ke charāġh jalte haiñ

ham apnī apnī zulmat apnī apnī raushnī ḳhud haiñ
luTe jitnā koī us ke liye itnā añdherā hai!

chale aao mire vīrān dil tak
abhī itnā añdherā bhī nahīñ hai

ye na kahnā ki añdherā hai bahut rāhoñ meñ
us se milnā to hathelī pe qamar rakh denā

lams kī vo raushnī bhī bujh ga.ī
jism ke andar añdherā aur hai

jidhar añdherā hai tanhā.ī hai udāsī hai
safar kī ham ne vahī samt kyuuñ muqarrar kī

baḌe ḳhulūs se māñgī thī raushnī kī duā
baḌhā kuchh aur añdherā charāġh jalne se

ye jo shab ke aivānoñ meñ ik halchal ik hashr bapā hai
ye jo añdherā simaT rahā hai ye jo ujālā phail rahā hai

hai uryānī to aadat chāndnī kī
añdherā be-sabab sharmā rahā hai

añdherā kar ke baiThe ho hamārī zindagānī meñ
magar apnī hathelī par nayā sūraj ugāte ho

raat bhar ḳhvāb ke dariyā meñ saverā dekhā
din ke sāhil pe jo utre to añdherā dekhā

jin ke chehroñ pe chamak nuur kā haalā atrāf
un ke zehnoñ ko jo kholā to añdherā dekhā

kamre meñ balb
āñgan meñ añdherā

añdherā itnā hai ab shahr ke muhāfiz ko
har ek raat koī ghar jalānā paḌtā hai

kaun se manzar kī tābānī añdherā kar ga.ī
aisā kyā dekhā ki ab āñkhoñ meñ bīnā.ī nahīñ

ye kaisī sub.h huī kaisā ye saverā hai
hamāre ghar meñ abhī tak vahī añdherā hai