Tags-Samundar

tujh meñ gar bārish samundar ke barābar hai to kyā
mere andar bhī hai sahrā ke barābar tishnagī

maiñ ek buuñd samundar huā to kaise huā
ye mojaza mire andar huā to kaise huā

is taraf se us taraf tak ḳhushk o tar paanī meñ hai
ab samundar se samundar tak nazar paanī meñ hai

jaane kab mere samundar ko koī sāhil mile
kab se merā jism sargarm-e-safar paanī meñ hai

yahī vīrāna bachā thā to ḳhudā ne āḳhir
rakh diye dil meñ mire saat samundar apne

apnī āñkhoñ ke samundar meñ utar jaane de
terā mujrim huuñ mujhe Duub ke mar jaane de

bujhā samundar kī pyaas yā-rab
ye kitnī nadiyāñ nigal rahā hai

tujh se chhuTne pe tire dhyān kī āġhosh milī
kar gayā mujh ko samundar ke havāle dariyā

safīne kitne hue is meñ ġharq-e-āb na pūchh
tū mere dil ke samundar kā iztirāb na pūchh

tumheñ dariyā-e-ḳhūbī kah diyā ġharq-e-nadāmat huuñ
kahāñ ye nāz-o-ġhamza āriz-o-kākul samundar meñ

ḳhayāl-e-yār kyūñ-kar aa gayā tūfān-e-girya meñ
ḳhudā ma.alūm kis shai kā banāyā pul samundar meñ

na chheḌo mujh ko maiñ ġhavvās huuñ dariyā-e-ma.anī kā
na DhūñDo mujh ko mustaġhraq huuñ maiñ bilkul samundar meñ

abhī to sair ko jaanā lab-e-dariyā vo sīkhe haiñ
abhī to dekhiye khilte haiñ kyā kyā gul samundar meñ

kisī din mujh ko le Dūbegā hijr-e-yār kā sadma
charāġh-e-hastī-e-mauhūm hogā gul samundar meñ

vo pā.īñ baaġh meñ phirte haiñ maiñ fikroñ meñ Duubā huuñ
tamāshā hai ki gul gulshan meñ hai bulbul samundar meñ

hamāre āh-o-nāla se zamāna hai tah-o-bālā
kabhī hai shor sahrā meñ kabhī hai ġhul samundar meñ

uThī mauj-e-sabā jumbāñ se shāḳh-e-āshiyāñ paiham
chalī jaatī hai goyā kashtī-e-bulbul samundar meñ

vo zālim āshiq-āzārī kī 'parvīñ' mashq kartā hai
dikhā kar bulbuloñ ko Dāltā hai gul samundar meñ

khilāyā partav-e-ruḳhsār ne kyā gul samundar meñ
hubāb aa kar bane har samt se bulbul samundar meñ

paḌā thā aks-e-rū-e-nāznīñ arsa huā us ko
par ab tak tairtā phirtā hai shakl-e-gul samundar meñ