Tags-Samundar

balā-e-jāñ haiñ ye gahrā.iyāñ samundar kī
azaab ishrat-e-qatra banā hai mere liye

mīThe paanī kī naddī kyuuñ bahe samundar or
jis ke man meñ pyaar kā dhan ho kyuuñ le vo bairāg

mujh se mat pūchh mirī tishna-labī ke tevar
ret chamkī to ye samjho ki samundar dekhā

sab kohsār samundar sahrā ghūmeñ us ke gird 'rashīd'
vo ik shaḳhs jo duniyā-bhar meñ tanhā tanhā rahtā hai

umīdī sīpiyāñ irfān sī thiiñ
samundar fikr kā pāyāb thā jab

falak par koī sāzish ho rahī hai
samundar par hī bārish ho rahī hai

Duub jā.ūñ maiñ tire ishq-samundar meñ 'nadīm'
apnī sāñsoñ se mirī sāñsoñ ko bojhal kar de

tū vo motī ki samundar meñ bhī sho.ala-zan thā
maiñ vo aañsū ki sar-e-ḳhāk girāyā hai mujhe

suukh ga.ī jab āñkhoñ meñ pyaar kī niilī jhiil 'qatīl'
tere dard kā zard samundar kaahe shor machā.egā

kyā dukh hai samundar ko batā bhī nahīñ saktā
aañsū kī tarah aañkh tak aa bhī nahīñ saktā

maiñ samundar huuñ kahīñ Duub na jā.ūñ ḳhud meñ
ab koī mauj kināre pe uchhāle mujh ko

hare samundar ke paas jā.ūñ
to vo bhī nikle sarāb niilā

yādoñ kā ik hujūm thā tanhā nahīñ thā maiñ
sāhil kī chāñdnī meñ samundar sharāb pī

mire andar faqat qatra nahīñ hai
samundar jhiil aur jharne sabhī haiñ

kohsār to kahīñ pe samundar bhī ā.eñge
apnī talāsh meñ na.e manzar bhī ā.eñge

ajab sahrā badan par aab kā ib.hām rakkhā hai
ye kis ne is samundar kā samundar naam rakkhā hai

ik samundar ke havāle saare ḳhat kartā rahā
vo hamāre saath apne ġham ġhalat kartā rahā

kyuuñ dauḌ ke aatī haiñ idhar maujeñ musalsal
kyā kam hai samundar meñ jo sāhil meñ chhupā hai

bas ek pal meñ kisī samundar meñ jā girūñgā
abhī sitāroñ meñ ho rahā hai shumār merā

ye aag aur ḳhuuñ ke samundar meñ girtā huā shahr merā nahīñ
havā se ulajhtā huā maiñ chalā jā rahā huuñ añdherā hai gahrā ghanā be-amāñ