Tags-Samundar

ishq ke gahre samundar meñ ga.e kyuuñ 'anvar'
uthle paanī meñ agar Duub ke marnā thā miyāñ

maiñ registān meñ baiThā huuñ lekin
samundar meñ utartā jā rahā huuñ

jo bhī aatā hai vahī dil meñ samā jaatā hai
kitne dariyāoñ kā pyāsā hai samundar merā

'samīna' mas.ala ye hai mirī qāmat se kamtar hai
hamesha pyaas pī kar lauT aatī huuñ samundar se

vo ishq ko kis tarah samajh pā.egā jis ne
sahrā se gale milte samundar nahīñ dekhā

terī āñkhoñ ke samundar meñ ḳhayāloñ kī tarah
Duub jaane kī ye aadat mujhe le Dūbegī

samundar apne markaz meñ khiñchā hai merī āñkhoñ kā
so ab mumkin nahīñ hai roknā sailāb raste meñ

ghabrā ke bulbule ne samundar kī zaat se
phailā diyā vajūd ko saarī dishāoñ meñ

udhar us paar kyā hai ye kabhī sochā nahīñ maiñ ne
magar maiñ roz khiḌkī se samundar dekh letā huuñ

baat ausāf kī hai nam kī nahīñ hai bhaa.ī
log be-ant samundar se bhī pyāse aa.e

log to jā ke samundar ko jalā aa.e haiñ
maiñ jise phūñk kar aayā vo mirā ghar niklā

har ek mauj mire paañv chhū ke lauT ga.ī
kahīñ ye ḳhvāb na hoñ niiñd ke samundar ke

ghaTāoñ kī udāsī pī rahā huuñ
maiñ ik gahrā samundar ban gayā huuñ

samundar meñ chhupe haiñ kitne tūfāñ
ye sāhil ko bhī andāza nahīñ hai

tum bahr-e-mohabbat ke kināre pe khaḌe the
tum ne mirī āñkhoñ meñ samundar nahīñ dekhā

mehr-o-mah diip huā abr samundar ḳhushbū
kis kī taqdīr meñ ārām likhā hai us ne

ek ḳhāmosh samundar thā mire chaar taraf
jis meñ āvāz ne tuġhyānī se āġhāz kiyā

sāmne mere hai duniyā jyuuñ samundar ret kā
aur sab kī zindagī jaise bavanDar ret kā

dhīre dhīre chaTTāneñ pighaltī rahīñ qatra qatra samundar nigaltī rahīñ
vo jo aañsū na Dhalkā kabhī gaal par, us ko dil ke sadaf ne guhar kar liyā

har ek jism ke chāroñ taraf samundar hai
yahāñ ajiib jazīroñ meñ log baste haiñ