Tags-Samundar

naav kāġhaz kī chhoḌ dī maiñ ne
ab samundar kī zimmedārī hai

zindagī bhar ham isī ummīd par chalte rahe
ab ke sahrā paar kar leñ to samundar aa.egā

vo merā sail-e-talab ho ki terī ra.anā.ī
chaḌhā hai jo bhī samundar use utarnā hai

suno samundar kī shoḳh lahro havā.eñ Thahrī haiñ tum bhī Thahro
vo duur sāhil pe ek bachcha abhī gharauñde banā rahā hai

samundar hai hamāre sāmne maġhrūr-o-ḳhud-sar sā
hameñ ik pul banā kar fāsle sab paar karne haiñ

meñ bach gayā huuñ magar saare ḳhvāb Duub ga.e
mirī tarah bhī samundar ko paar mat karnā

sahrā meñ aab aur samundar meñ ret hai
yā-rab maiñ aaj kaun sī duniyā meñ aa gayā

samundar tishnagī vahshat rasā.ī chashma-e-lab tak
ye saarā khel in āñkhoñ se dekhā tere kartab tak

ek muddat se jo sahrā-e-masarrat thī 'salīm'
ġham ke chhūte hī vahī chashm samundar huī hai

ye vaqt kā be-karāñ samundar maiñ us kī had tak pahuñch na paayā
girā thā sāhil pe TuuT kar jo huā thā jo ġharq-e-āb maiñ huuñ

sher meñ saath ravānī ke ma.ānī bhī to bhar
ai 'sadā' qaid tū kuuze meñ samundar kar de

ḳhvāboñ kī naav aur samundar kā madd-o-jazr
Takrā ke paash paash use ho jaanā chāhiye

puure chāñd se vyākul sajnī jaage saarī raat
is barkhā mat ja.īho sājan saat samundar paar

ye kin ke paas girvī rakh diyā ham ne samundar
ye kin logoñ ko sāhil par utārā jā rahā hai

panchhī ke do paroñ ke nīche simTā saarā samundar
apne zarf kī gahrā.ī meñ Duub ga.ī tuġhyānī

dil par ik ghanghor ghaTā sī chhā.ī hai
āñkhoñ meñ phirtā hai samundar zindābād

mirī nigāhoñ se ho ke jaatā hai un kā paanī
ye saare dariyā sabhī samundar haiñ ek jaise

ġharq kartā hai na detā hai kināra hī mujhe
us ne merī zaat meñ kaisā samundar rakh diyā

ab ye ḳhabar nahīñ vo samundar hai yā sarāb
apne yahāñ hai tishnagī-e-jism-o-jāñ bahut

yahī baa.is hai merī tishnagī kā
samundar mujh se paanī māñgtā hai