Tags-Samundar

samundar ab tū unheñ aur be-qarār na kar
guzar ke aa.ī haiñ lahreñ hazār nahroñ se

us kī pahchān faqat koh-o-samundar se nahīñ
zarra-e-ḳhāk bhī ḳhurshīd-e-vatan us kā hai

ye kaisī baat huī hai ki dekh kar ḳhush hai
vo āñsuoñ ke samundar ke darmiyān mujhe

ab kināroñ se na māñge qatre qatre kā hisāb
kyuuñ samundar kī taraf bahtā huā dariyā gayā

dhoñs detā hai ye sūraj mujhe har shaam 'hasan'
vo jo Duubā to samundar se nikalne kā nahīñ

dil-dariyā kī thaah batā.eñ kyā jis meñ
saat samundar kī gahrā.ī rahtī hai

maiñ ek harf ma.ānī kā ek daftar vo
maiñ ek mauj-e-sarāb-e-junūñ samundar vo

kahtī haiñ mujh se soch samundar kī vus.ateñ
'ārif' tū apnī zaat ke tālāb se nikal

duniyā bhar meñ ek haqīqat sachchā ek vajūd 'rashīd'
varna saare jañgal parbat sahrā aur samundar jhuuT

chāhat kā sansār hai jhūTā pyaar ke sāt-samundar jhuuT
saarī duniyā bol rahī hai kitne sundar sundar jhuuT

dariyā sā samundar meñ utarne ko thā betāb
utrā use dekhā jo vo Duubā use dekhā

tum se ik ghūñT kī pyaas kyā bujh sakī jab ki vābastagī to samundar se thī
ham ne dariyāoñ tak kā safar tai kiyā apne be-ma.anī sī tishnagī ke liye

Duub jā.ūñ kisī samundar meñ
phir jazīroñ ke ḳhvāb bhī dekhūñ

kab shauq mirā jazbe se bāhar na huā thā
thā kaun sā qatra jo samundar na huā thā

dil ke ik goshe meñ simaT aate haiñ 'ramz'
sātoñ āsmāñ sātoñ samundar shām-Dhale

shāyad tire hisse meñ ho motī kā muqaddar
ai qatra-e-jāñ aaj samundar meñ utar dekh

ek qatre kī talab aur thā samundar sāmne
bazm-e-yārāñ meñ bhalā vo bad-aqīda kaun thā

jī haar ke tum paar na kar paao nadī bhī
vaise to samundar kā bhī hotā hai kinārā

ḳhāmoshiyāñ us sāhil-e-āvāz se aage
pātāl se gahrī haiñ, samundar se baḌī haiñ