Tags-Samundar

paanī meñ chamaktā hai koī mehrbāñ saaya
shaffāf samundar hoñ use chuum rahā huuñ

hai ajab dhuñd jidhar aañkh uThā kar dekhūñ
reg-e-sāhil se nimaT luuñ to samundar dekhūñ

ik kashmakash meñ ab haiñ samundar paḌe hue
sahrā kī tah meñ phir koī pyāsā utar gayā

kashtiyoñ kī qīmateñ baḌhne lagīñ
jitne sahrā the samundar ho ga.e

vo āgahī ke samundar kahāñ haiñ jin ke liye
tamām-umr ye pyāse safar meñ rahte haiñ

kisī sunsān jazīre se pukāro mujh ko
maiñ sadāoñ ke samundar meñ nikal aayā huuñ

'akhilesh' kab bujhī hai havas kī shadīd pyaas
dariyā tamām pī le samundar kī aarzū

aisī maazī ke samundar ne qayāmat Dhaa.ī
dil kī bastī huī vīrān ḳhudā ḳhair kare

samundar paar aa baiThe magar kyā
na.e mulkoñ meñ ban jaate haiñ ghar kyā

zabāneñ band hoñgī shahar-bhar kī
kisī din gar samundar bol uTThe

ḳhvāboñ kī ek naav samundar meñ Daal ke
tūfāñ kī mauj mauj se Takrānā chāhiye

lo khel khel meñ banñe ko ban ga.ī kashtī
magar mizāj samundar kā kuchh patā hī nahīñ

vus.at-e-be-karāñ maḳhzan-e-sīm-o-zar be-had-o-be-nishāñ terī har rah-guzar
tū ba-hadd-e-nazar maiñ kanār-e-safar tū samundar hai maiñ sāhiloñ kī havā

tū bahāroñ kī jā tū libās-e-shajar maiñ ḳhizāñ kī sadā maiñ ġhubār-e-safar
tū numūd-e-matar maiñ hadīs-e-digar tū samundar hai maiñ sāhiloñ kī havā

gaah shorīda-sar gaah ḳhāmosh-tar tujh meñ poshīda haiñ raaz sab basta-sar
tere lāl-o-gohar aur maiñ ḳhāk-sar tū samundar hai maiñ sāhiloñ kī havā

tujh se hai sab ye husn-e-jahāñ mo'tabar tujh ko sajde kare kahkashāñ sar ba-sar
tū harīm-e-qamar maiñ hazīn-e-sahar tū samundar hai maiñ sāhiloñ kī havā

maiñ tire sañg kaise chalūñ ham-safar tū samundar hai maiñ sāhiloñ kī havā
tū kahāñ maiñ kahāñ al-amāñ al-hazar tū samundar hai maiñ sāhiloñ kī havā

be-ghar thā phir chhoḌ gayā ghar jaane kyuuñ
paar kiyā hai saat samundar jaane kyuuñ

maiñ pī gayā huuñ ka.ī āñso.oñ ke sail-e-ravāñ
maiñ apne dil ko samundar banā.e baiThā huuñ

soch kī mauj-e-ravāñ le ke kidhar aa.ī hai
ye samundar kā kināra hai ki gahrā.ī hai