Tags-Samundar

log zer-e-ḳhāk bhī to Duub jaate haiñ 'adīm'
ik samundar hī nahīñ hai Duub jaane ke liye

apne andar se jo bāhar nikle
ḳhud-numā.ī kā samundar nikle

samundar kī haqīqat pā ga.e gahrā.ī meñ jā kar
baḌe pur-rāz haiñ vo jo bahut ḳhāmosh hote haiñ

maiñ ne apnī donoñ āñkhoñ meñ ugaa.e haiñ pahāḌ
terī āñkhoñ meñ samundar thā vahāñ sahrā ugā

kūza-e-dard meñ ḳhushiyoñ ke samundar rakh de
apne hoñToñ ko mire zaḳhm ke uupar rakh de

aur is meñ tair kar mujhe honā hai surḳh-rū
darpesh hai lahū kā samundar mire aziiz

laḌnā har ek lamha samundar se raat ke
aur ḳhvāb ke jazīre meñ ik ghar tarāshnā

aap samundar kī kahte haiñ
dariyā tak to khārā niklā

ab tujh se kis muñh se kah deñ saat samundar paar na jā
biich kī ik dīvār bhī ham to phāñd na paa.e Dhā na sake

us dariyā se aage ek samundar bhī hai
aur vo be-sāhil hai ye bhī dhyān meñ rakhnā

kal yahī bachche samundar ko muqābil pā.eñge
aaj tairāte haiñ jo kāġhaz kī nannhī kashtiyāñ

kuchh āñsuoñ se hī nikle to nikle kaam koī
vo daaġh huuñ ki samundar bhī kam haiñ dhone ko

jo aaj dekho to baiThe haiñ nīl-kañTh bane
ga.e the ham bhī samundar kabhī bilone ko

ye samundar kī mehrbānī thī
tum ne sāhil ko chhū ke dekh liyā

jazīre dhuñd ke pīchhe chhupe the
samundar se jahāñ mausam mile the

tum apne dariyā kā ronā rone aa jaate ho
ham to apne saat samundar pīchhe chhoḌ aa.e haiñ

sunā hai zindagī koī tah-e-samundar hai
bhañvar ke haath meñ ye bādbān de duuñ kyā

tūfān kī zad meñ the ḳhayāloñ ke safīne
maiñ ulTā samundar kī taraf bhaag rahā thā

nikal bhī lo ki is bastī meñ aksar
darīchoñ se samundar jhāñktā hai

ab apne aap ko qatra bhī kah nahīñ saktā
burā kiyā jo samundar se āshnā.ī kī