Tags-Saqi

bazm-e-yārāñ hai ye saaqī mai nahīñ to ġham na kar
kitne haiñ jo mai-kada bar-dosh haiñ yāroñ ke biich

jām-o-mīnā ke ta.ayyun se hai baalā saaqī
zarf dekhā nahīñ jaatā kisī paimāne se

saaqī havā-e-sard ko tū sarsarī na jaan
kaifiyyat us kī pūchh nabāt-e-nabāt se

nashsha zamīñ se sū-e-falak le uḌā mujhe
saaqī sharāb ne mirī miTTī ḳharāb kī

saaqī tire karam se ye ummīd hai mujhe
ho roz-e-hashr haath meñ botal sharāb kī

chhalaktā sāġhar-e-mai pī ke chashm-e-sāqī se
sikhā.ī saare zamāna ko mai-kashī maiñ ne

rakh liyā saaqī ne merī ḳhastagī kā ye bharam
shaiḳh kī majlis meñ ham pastī kā sāmāñ ho ga.e

maqdūr tak sharāb se rakh añkhḌiyoñ meñ rañg
ye chashmak-e-pyāla hai saaqī havā-e-gul

terā to qaul thā ki na hovegī ye tamām
ai saaqī do hī ghūñT meñ bas mai nibaḌ ga.ī

mujh meñ samā na jaa.e is zindagī kī talḳhī
saaqī sharāb denā saaqī sharāb denā

jur.a jur.a pilā mujhe saaqī
man hiran sātgīñ udāsī hai

na saaqī na botal na hai raqs-e-sāġhar udāsī hai chhā.ī huī anjuman par
fanā-sāzoñ dil se ġhazal aisī chheḌo 'fanā' naach uThe zindagī jhuum jaa.e

saaqī shitāb jām-e-subūhī pilā mujhe
kyā jāniye bachūñ na bachūñ maiñ ḳhumār tak

taaq se miinā utārā paañv meñ laġhzish huī
kī na saaqī se barābar aañkh sharmātā rahā

mai-kash-e-āvāra is duniyā se kyā uTh kar gayā
mai ga.ī jām-o-subū sāqī-o-mai-ḳhane ga.e

mai-kasho mai kī kamī beshī pe nāhaq josh hai
ye to saaqī jāntā hai kis ko kitnā hosh hai

hoñToñ ko sharāb ab pilā de saaqī
rag rag meñ ik aag lagā de saaqī

mai-kada chhoḌe hue mujh ko zamāna guzrā
aur saaqī se mujhe duur kā rishta bhī nahīñ

ye gardish-e-paimāna hai yā gardish-e-taqdīr
saaqī kisī sāġhar pe to ho naam hamārā