Tags-Saqi

pilā.e le ke naqd-e-hosh saaqī
tahī-dastoñ kī hai auqāt thoḌī

ye shahr bhī mahfūz nahīñ qahr-e-ḳhudā se
saaqī bhī haiñ mai-ḳhāne bhī haiñ jaam bahut haiñ

ajab hañgāma dekhā ham ne saaqī terī mahfil meñ
koī tishna-dahan uTThā koī chhalkā ke jaam aayā

apne hāthoñ se pilā de saaqī
riñd ik ghūñT meñ tar jā.eñge

ye bhī dekhā hai ki saaqī se milā jaam magar
hoñT tarse hue pahuñche nahīñ paimāne tak

saaqī ne bhī mujhe nazar-andāz kar diyā
mujh par nigāh-e-mīr-e-ḳharābāt bhī nahīñ

taf-e-dil ke bujhāne ko hamārī ḳhaak par saaqī
chhīḌaknā hai mai-gulgūñ kī az-dast-e-subū ātish

zahr se dho liye haiñ hoñT apne
lutf-e-sāqī ne jab kamī kī hai

saaqī tire daur meñ kisī kī
hotī bhī hai mustajāb tauba

vaqt-e-āḳhir yaad hai saaqī kī mehmānī mujhe
marte marte de diyā añgūr kā paanī mujhe

tere mai-ḳhāne ke dam toḌte aa.eñ saaqī
kisī taġh.īr-e-numāyāñ kī ḳhabar dete haiñ

kyā rañg-e-zamīn-o-āsmāñ hai saaqī
utrā huā chehra-e-jahāñ hai saaqī

saaqī tū chāhe to vo daur bhī aa saktā hai
ki mile jām-e-sharāb us ko jo paanī māñge

saaqī kī ek nazar hī hameñ mast kar ga.ī
kis ko surāhī-o-ḳham-o-sāġhar kā hosh hai

saaqī ke nām-levā maiḳhāne rah ga.e haiñ
mai-ḳhānoñ meñ bhī ḳhālī paimāne rah ga.e haiñ

kyuuñ jām-e-sharāb-e-nāb māñgūñ
saaqī kī nazar meñ kyā nahīñ hai

ġhazal ke naam ko badnām kar diyā us ne
kuchh aur de mire saaqī mujhe sharāb na de

jaane kyuuñ dekh kar tujhe saaqī
aaj phir yād-e-mai-kashī aa.ī

ham mai-kade meñ jā ke hue tishna ziyāda
badlī huī saaqī kī nazar dekh rahe haiñ

piye hue haiñ sharāb-e-sāqī chaḌhī hai mastī-e-pāk-bāzī
vo bāda-kash meñ mudām-e-sāqī jo duḳht-e-raz ko khañgālte haiñ