Tags-Sawal

har ek lafz pashemāñ pas-e-ġhubār-e-sukūt
javāb kī vo hoñ rāteñ ki phir savāl ke din

shauq-e-visāl hai yahāñ lab pe savāl hai yahāñ
kis kī majāl hai yahāñ ham se nazar milā sake

na hone aur hone kī haqīqat
savāl-e-nafī-o-isbāt kyā hai

dekhte haiñ har nazar meñ hazāroñ savāl
kahte haiñ ḳhud se na Dar tū sambhāl

savāl-e-tajurba-e-kār-e-saḳht uThne lagā
so phir tamavvuj-e-andoh-baḳht uThne lagā

zindagī tishna-e-majāl-e-javāb
lamha lamha savāl-āmāda

vo hairatoñ kī mukammal kitāb likh denā
savāl karne se pahle javāb likh denā

ab mirī pyaas ke bujhne kā nahīñ koī savāl
ab mire naam kī sahbā kisī sāġhar meñ nahīñ

javāb dene ko jī chāhtā nahīñ us ko
savāl vaise baḌī ājizī se kartā hai

pūchho koī savāl milegā ġhalat javāb
'vālī' har ek shaḳhs yahāñ bad-havās hai

mere ehsās-e-ḳhudī par na koī zad aa.e
tū jo de de mujhe be-harf savāl achchhā hai

jo sarāpā savāl lagtā ho
us ko kaise javāb tak aa.e

vo jaane vaalā hameñ kis tarah bhulā.egā
hamāre pesh-e-nazar ek ye savāl bhī thā

ḳhilāf ham nahīñ aḳhtar-shumāriyoñ ke magar
savāl ye hai ki nīndeñ gañvā.eñ kis ke liye

vasl kā jab savāl ho un se
bas ''nahīñ'' meñ javāb rahtā hai

ki pā liyā hai kise aur kho diyā kis ko
yahī savāl hai kyā kyā javāb rakkhūñgā

mujhe savāl gaḌit ke samajh nahīñ aate
tire fareb ke kaise hisāb rakkhūñgā

tujhe savāl kī mohlat kabhī nahīñ milnī
har ik vaqt ke pahle javāb rakkhūñgā

bas ek rasta hai guftugū kā bas ek sūrat hai rābte kī
ḳhatoñ meñ un se savāl karnā ḳhatoñ meñ un ke javāb paḌhnā

unheñ savāl hī lagtā hai merā ronā bhī
ajab sazā hai jahāñ meñ ġharīb honā bhī