Tags-Saya

mā.il-e-sajda ġhulāmī bhuul jā ḳhū-e-salāmī
aaj vo bādal kahāñ sāya-fagan jo kal rahe haiñ

Daal do saayā apne āñchal kā
nā-tavāñ huuñ kafan bhī ho halkā

vo tum tak kaise aatā
jism se bhārī saaya thā

ho kuchh aaseb to vaañ chāhiye ganDā ta.avīz
aur jo ho ishq kā saaya to kare kyā ta.avīz

ik sāñvlī chhat ke girne se
ik pāgal saaya kuchal gayā

nahīñ hai saaya ki sun kar naved-e-maqdam-e-yār
ga.e haiñ chand qadam pesh-tar dar-o-dīvār

ye kis maqām pe laayā gayā ḳhudāyā mujhe
ki aaj rauñd ke guzrā hai merā saaya mujhe

dhuup hālāt kī ho tez to aur kyā māñgo
kisī dāman kī havā zulf kā saaya māñgo

safar meñ dhuup kī shiddat kahāñ tak jheltā āḳhir
tirī yādoñ ko oḌhā aur saaya kar liyā maiñ ne

khiḌkī se chhante chāñd meñ nazdīk ātish-dān ke
zulfoñ kā saaya oḌh ke baiThī haiñ āñkheñ ghaat meñ

ik saaya sharmātā lajātā raah meñ tanhā chhoḌ gayā
maiñ parchhā.īñ DhūñD rahā huuñ TuuTī huī dīvāroñ par

sukūt-e-shab meñ āñkheñ band hoñgī jab darīchoñ kī
koī saaya nazar aa.egā dar dar dekhnā ab ke

māvarā.ī saaya jalva jo gurezāñ hai mirī nazroñ se
merī bāñhoñ kī harārat meñ kabhī sham.a ke mānind pighal jaatā thā

na koī ret kā Tiila na sāya-dār daraḳht
rah-e-vafā meñ musāfir kahāñ qayām kareñ

mire kār-zār-e-hayāt meñ rahe umr-bhar ye muqāble
kabhī saaya dab gayā dhuup se kabhī dhuup dab ga.ī saa.e se

vo saaya jo bujhā to kyā badan bhī saath bujh gayā
nazar ko tīrgī kā ab malāl kyuuñ nahīñ rahā

saaya ban kar maiñ salīboñ se utar aayā huuñ
ab koī aur sazā do ki maiñ zinda huuñ abhī

ḳhudā rakkhe 'sabīla' har ghaḌī māñ-bāp kā saaya
duā se jin kī tūfāñ bhī mujhe tūfāñ nahīñ lagtā

ḳhāk-e-siyah se meñ jo barābar huā huuñ 'mīr'
saaya paḌā hai mujh pe kaso tīra-baḳht kā

sabzān in rū kī jahāñ jalva-gāh thī
ab dekhiye to vaañ nahīñ saaya daraḳht kā