Tags-Shahr

ghar meñ jī lagtā nahīñ aur shahr ke
rāste lagte nahīñ apne aziiz

vo shahr-e-hairat kā shāhzāda giraft-e-idrāk meñ nahīñ hai
us ek chehre kī hairatoñ meñ hazār āñkheñ samā chukī haiñ

kuchh zamīñ kī hai ye tāsīr ki chehre haiñ hasīñ
shahr gar shahr na hotā koī gulshan hotā

dasht meñ shahr yaad aatā hai
ishq kā pahlā tajraba hai mujhe

bantī nahīñ baat to phir baat kyā kareñ
bigḌe hue haiñ shahr ke hālāt kyā kareñ

tū chalā gayā hai to shahr phir vahī dasht-e-ġham hai mire liye
vahī maiñ huuñ aur mirī zindagī mire āñsuoñ meñ bharī huī

ab ke shahr-e-zindagī meñ sāneha aisā huā
maiñ sadā detā use vo mujh ko taktā rah gayā

jo haiñ mazlūm un ko to taḌaptā chhoḌ dete haiñ
ye kaisā shahr hai zālim ko zinda chhoḌ dete haiñ

amīr-e-shahr se hai maslahat bajā lekin
hai baat sach to kaho hausla nahīñ hai kyā

is shahr meñ kis se mileñ ham se to chhūTīñ mahfileñ
har shaḳhs terā naam le har shaḳhs dīvānā tirā

ye dekhnā hai ki raftār kar rahī hai kyā
tamām shahr ko tasvīr chāhte haiñ ham

mire liye shahr-e-kaj meñ rakkhā hī kyā hai jo apne ġham gañvā.ūñ
vo ek dāmāñ bahut hai mujh ko sukūt-afzā farāġhatoñ meñ

ḳhud apnī chaal se nā-āshnā rahe hai koī
ḳhirad ke shahr meñ yuuñ lāpatā rahe hai koī

har ahd kī shahriyat se mahrūm
har shahr meñ be-vatan haiñ ham log

dil kī āvāz pe niklā thā baġhāvat ke liye
shahr kā shahr himāyat se mujhe dekhtā hai

chāTī aur chūlhā sab auñdhe be-masraf baiThī hai gorī
bhor bha.e bastī se bik kar shahr kī jānib duudh gayā

aa.e the shahr-e-husn meñ ik din
aur ik umr se yahīñ ke haiñ

kuchh din se uTh rahī hai dil-o-shahar-e-jāñ se ḳhaak
jab ham hare bhare haiñ to aa.ī kahāñ se ḳhaak

sub.h kaisī hai vahāñ shaam kī rañgat kyā hai
ab tire shahr meñ hālāt kī sūrat kyā hai

agar phir shahr meñ vo ḳhush-adā vāpas palaT aa.e
mulāqātoñ kā shāyad silsila vāpas palaT aa.e