Tags-Shahr

balā-e-shahr mujhe DhūñDhtī thī galiyoñ meñ
maiñ apne-āp ko ghar meñ chhupā.e baiThā thā

guzro kisī bastī se zarā bhes badal kar
naqshe meñ tumheñ shahr-e-sitamgar na milegā

mere hī sañg-o-ḳhisht se ta.amīr-e-bām-o-dar
mere hī ghar ko shahr meñ shāmil kahā na jaa.e

dekhā bas ik dafa use maiñ ne qarīb se
phir ahl-e-shahr ne mirī āñkheñ nikāl diiñ

ghar se bāhar jāñ-levā sannāTā thā
dekhī shahr kī vīrānī to kaañp ga.ī

ye aur baat ki ab maiñ 'ra.īs'-e-mahfil huuñ
ġharīb-e-shahr kabhī thā meñ aap hī kī tarah

habs-e-dam ke mo'taqid tum hoge shaiḳh-e-shahr ke
ye to albatta ki sun kar la.an dam khāne lagā

phir usī shahr meñ aa.e ho palaT kar ki jahāñ
chand hote haiñ jo tum ne dikhā.e the ḳhvāb

pahle to ham chhān aa.e ḳhaak saare shahr kī
tab kahīñ jā kar khulā us kā makāñ hai sāmne

ai saḳhiyo ai ḳhush-nazro yak guuna karam ḳhairāt karo
na.ara-zanāñ kuchh log phireñ haiñ sub.h se shahr-e-nigār ke biich

baḌe ajiib haiñ shahr-e-junūñ ke bāshinde
hamesha kahte haiñ ba.ad-az-salām ishq ba-ḳhair

jagah phūloñ kī rakhte haiñ ghanā saaya banāte haiñ
chalo apne ḳhayālī shahr kā naqsha banāte haiñ

us shahr meñ kitne chehre the kuchh yaad nahīñ sab bhuul ga.e
ik shaḳhs kitāboñ jaisā thā vo shaḳhs zabānī yaad huā

kis tarah bhulā.eñ ham is shahr ke hañgāme
har dard abhī baaqī hai har zaḳhm abhī taaza hai

is shahar kā dastūr hai rishtoñ kā bhulānā
tajdīd-e-marāsim ke liye haath na bāñdhūñ

ab apne aap se milne kī justujū kyā ho
tumhāre shahr ke sab aa.ine to kaale haiñ

rañg kachchā hai tire shahr-e-vafā kā jānāñ
ġham kī ik lahr chalegī to utar jā.egā

yahāñ tak aa.ī hai biphre hue lahū kī sadā
hamāre shahr meñ kyā kuchh nahīñ huā hogā

ik anjāne shahr meñ dekhūñ shakl koī jānī-pahchānī
us kī or khiñchā jaatā huuñ raat mujhe pāgal kartī hai

sail aisā thā ki sab shahr-e-badan Duub gayā
raat bārish ne ajab bazm sajā.ī ghar meñ