Tags-Shahr

shorish mire dimāġh meñ bhī koī kam nahīñ
ye shahr bhī hai shor-o-shaġhab se bharā huā

aa mire saath mire shahr meñ aa
jis se bhaag aatā huuñ aksar maiñ bhī

ḳhirāj maañg rahī hai vo shāh-bānu-e-shahr
so ham bhī hadiya-e-dast-e-talab guzārte haiñ

log mujh ko mire āhañg se pahchān ga.e
kaun badnām rahā shahr-e-suḳhan meñ aisā

nāsehoñ ke haath se chhoḌeñge rahnā shahr kā
dekhte haiñ aur din do-chār ab bantī nahīñ

ham to sahrā hue jaate the ki us ne aa kar
shahr ābād kiyā nahr-e-sabā jaarī kī

dam ġhanīmat hai us masīhā kā
ab tabīboñ se shahr ḳhālī hai

ḳhayāl aatā hai shahr-e-ārzū ko chhoḌ dene kā
bahut dushvār ho jaatī hai jab bhī koī āsānī

hotā hai mehrbān kahāñ par ḳhudā-e-ishq
lagtī hai phir bhī shahr meñ khul ke sadā-e-ishq

detā huuñ saare shahr meñ bas ek hī sadā
darvesh degā ḳhair meñ sab ko dua.a-e-ishq

tamām shahr meñ mauzū-e-guftugū hai yahī
ki shāhzādī ġhulāmoñ meñ aa ke baiTh ga.ī

zamīñ ke gird bhī paanī zamīñ kī tah meñ bhī
ye shahr jam ke khaḌā hai jo tairtā hī na ho

ma.arka jab chhiḌ gayā to kyā huā ham se suno
kushtagān-e-shahr-e-ḳhūñ kā mājrā ham se suno

jab ā.īne dar-o-dīvār par nikal aa.eñ
to shahr-e-zāt meñ rahnā bhī ik qayāmat hai

dard kā shahr kahīñ karb kā sahrā hogā
log vāqif the koī ghar se na niklā hogā

ek ummīd har ik dar pe liye jaatī hai
ye mirā shahr thā koī to shanāsā hogā

yuuñ bhī aage raah kaThin hai aur athāh añdherā hai
ai maazī ke shahr-e-charāġhāñ yuuñ na mujhe pīchhe se pukār

ḳhushbu-e-badan aa.ī hai phir mauj-e-sabā se
phir kis ko pukārā hai tire shahr tarab ne

dhuāñ jo kuchh gharoñ se uTh rahā hai
na puure shahar par chhā.e to kahnā

vahīñ phirtā huuñ maiñ bhī ḳhāk-basar
is bhare shahr meñ hai ek galī