Tags-Shahr

baat vafā kī dil vāloñ kī nagrī meñ hai aam bahut
shahr-e-butāñ meñ giit vafā ke gā paao to baat bane

sailāb haiñ chehroñ ke to āvāz ke dariyā
ye shahr-e-tamannā to nahīñ dasht-e-sadā hai

sab chehroñ par ek hī rañg aur sab āñkhoñ meñ ek hī ḳhvāb
phir bhī jaane bastī bastī maqtal kyuuñ hai shahr-e-gulāb

ham be-dar be-ghar logoñ kī ek duā bas ek duā
mālik shahr-e-gulāb salāmat ham par jo bhī aa.e azaab

koī huā na dast-basar shahr-e-husn meñ
shāyad nahīñ hai rasm-e-javāb salām yaañ

chaman ye shahr-e-nigārāñ banā to hai lekin
mirī bahār ko chhoḌ aa.ī hai bahār kahāñ

vo shahr miT chukā jo basāyā thā pyaar kā
kyā DhūñDte ho yaar ḳharāboñ meñ kuchh nahīñ

jis jipsi kā zikr hai tum se dil ko usī kī khoj rahī
yuuñ to hamāre shahr meñ aksar melā lagā nigāroñ kā

shahr meñ jab se aa gayā huuñ tire
aur bhī baḌh ga.ī hai tanhā.ī

jo hamārā haal hai us se alag un kā nahīñ
sākinān-e-shahr se kyā parda-dārī kījiye

mirā junūn hai kotāh yā ye shahr-e-tabāh
jo zaḳhm-e-sar ke liye yaañ talāsh-e-sañg nahīñ

abhī abhī koī shahr-e-tarab se guzrā hai
kise dikhā.ūñ dhuāñ bhar rahā hai āñkhoñ meñ

kuchh muġhbachoñ kī jur.at-e-rindāna ke nisār
ab ke ḳhatīb-e-shahr kī dastār to girī

ik ghar bhī salāmat nahīñ ab shahr-e-vafā meñ
to aag lagāne ko kidhar jaa.e hai pyāre

aql ke shahr meñ aayā hai to yuuñ gum hai junūñ
lab-e-goyā ko bhī be-sāḳhta-pan yaad nahīñ

ai fasīl-e-shahr tū rahiyo gavāh
sāhib-e-ālam kī hurmat hai yahāñ

shahr kyā hai ek dasht-e-be-hisī
gaañv to phir bhī ġhanīmat hai yahāñ

ik umr se go rasm-e-junūñ chhoḌ chukā hai
dīvāna tire shahr meñ badnām hai ab bhī

shahar talvār se tum jiit ga.e ho lekin
yuuñ diloñ kī to hukūmat nahīñ milne vaalī

na thā shahr-e-dehlī ye thā chaman kaho kis tarah kā thā yaañ aman
jo ḳhitāb thā vo miTā diyā faqat ab to ujḌā dayār hai