Tags-Shahr

tumhāre shahr se chaliye ki tañg-dastī ne
tumhāre shahr kī galiyāñ bhī tañg kar dī haiñ

havā-e-shahr-e-ġharībī kī kaifiyat thī ajiib
nashe meñ rah ke bhī ham apne aap hī meñ rahe

pukārte rahe kyā kyā na dil ke vīrāne
ham aise shahr meñ uljhe the shahr hī meñ rahe

jis se bhī mileñ jhuk ke mileñ hañs ke hoñ ruḳhsat
aḳhlāq bhī is shahar meñ pesha nazar aa.e

shahr meñ ek ajab ḳhāk-ba-sar aayā hai
koī uftād paḌī hai ki idhar aayā hai

ye to us shahr ke raste bhī samajhte hoñge
aane vaalā baḌī rāhoñ se guzar aayā hai

zindagī karne lagī shahr ke halqe meñ tavāf
rāsta koh se dariyā meñ utar aayā hai

ajnabī-zād huuñ is shahr meñ maiñ
ajnabī mujh se sivā hai mirā dil

sañg uThānā to baḌī baat hai ab shahr ke log
aañkh uThā kar bhī nahīñ dekhte dīvāne ko

jaane kis samt hue log ravāna saare
ek maiñ shahr meñ huuñ dard kā maarā baaqī

sar-nigūñ guzrā hai shāyad ab ke talvāroñ kā mausam
be-irāda shahr kī mardum-shumārī kar rahā huuñ

tumhāre shahr ko maiñ kyuuñ na kāmrūp kahūñ
ki ik nigāh ne mujh ko banā diyā patthar

koī kisī kī taraf hai koī kisī kī taraf
kahāñ hai shahr meñ ab koī zindagī kī taraf

tamām shahr kī sham.eñ usī se raushan thiiñ
kabhī ujālā bahut thā kisī galī kī taraf

ajiib ḳhvāhish hai shahr vāloñ se chhup chhupā kar kitāb likkhūñ
tumhāre naam apnī zindagī kī kitāb kā intisāb likkhūñ

ik ajnabī ke lahū par thā sab kā haq 'rāhī'
sunā hai shahr kā har shaḳhs ḳhūñ-bahā legā

jaane chalī hai kaisī havā saare shahr meñ
socheñ huiiñ saroñ se judā saare shahr meñ

merī har ek arz hai nā-mo'tabar yahāñ
us kā har ek hukm ravā saare shahr meñ

sargoshiyāñ haiñ aur jhuke sar haiñ ḳhauf hai
sahmī huī hai ḳhalq-e-ḳhudā saare shahr meñ

badlī mirī nigāh ki chehre badal ga.e
koī bhī mo'atabar na rahā saare shahr meñ