Tags-Shajar

ek aisā bhī shajar ho jo 'amīr'
apne saa.e meñ Thaharne de mujhe

ham ki sūkhe hue shajar kī tarah
ek uljhī huī nazar kī tarah

ye mirā zauq-e-safar hai varna aisī dhuup meñ
har qadam par ik shajar chhitnār rakh jaatā hai kaun

sūkhe shajar hare jo hue phir to kyā huā
nāsūr-e-nau hamāre bhī zaḳhm-e-kuhan meñ hai

phir ek saffāk saḳht jhoñkā barahana-tar kar gayā shajar ko
jab us ko dekhoge ḳhatm-e-shab meñ to patte patte se Dar lagegā

zahe qismat ki saaye daar bhī hai bā samar bhī
mire sar par mohabbat kā shajar kitnā hasīñ hai

khaḌe the apnī jaḌoñ par kisī shajar kī tarah
hamārī ḳhātir-e-nāzuk pe baar apnā thā

mire hālāt ko bas yuuñ samajh lo
parinde par shajar rakkhā huā hai

phaloñ ko luuT ke le jaao peḌ mat kaaTo
shajar aziiz hai mujh ko samar aziiz nahīñ

havā kā haath baTā.ūñgā har tabāhī meñ
hare shajar se parinde maiñ ḳhud uḌā dūñgā

zindagī guzrī mirī ḳhushk shajar kī sūrat
maiñ ne dekhī na kabhī barg-o-samar kī sūrat

parinde jis taraf jaa.eñ palaT aate haiñ shab ko
vo apnā āshiyāñ apnā shajar pahchānte haiñ

maiñ ik shajar kī tarah rah-guzar meñ Thahrā huuñ
thakan utaar ke tū kis taraf ravāna huā

bhaa.ī se tab kahā ye hasan ne ba-iltifāt
be-vaj.h ham se rūThe ho tum ai niko-sifāt

chob-e-sahrā bhī vahāñ rashk-e-samar kahlā.e
ham ḳhizāñ-baḳht shajar ho ke hajar kahlā.e

bārish bahā ke le ga.ī tinkoñ kā āshiyāñ
bhīge shajar kī shāḳh pe chiḌiyā udaas hai

shajar ke saath koī barg-e-zard bhī na rahā
havā chalī to bahāroñ ke nauhagar bhī ga.e

hamārī raah meñ saaya kahīñ nahīñ thā magar
kisī shajar ne pukārā to ham Thahar bhī ga.e

sabz pattoñ kī qabā kis ne hai chhīnī us se
ik-na-ik roz ye uqda to shajar kholegā

na jaane kis ke bichhaḌne kā ḳhauf hai un ko
jo roz ghar se nikal kar shajar ko dekhte haiñ