Tags-Shajar

ab to is baaġh pe hai sab kī mohabbat kī nigāh
jo ki paude the shajar ho ga.e māshā-allāh

shukr ai bād-e-fanā juuñ shajar-e-soḳhta maiñ
thā to gulshan meñ vale qābil-e-gulzār na thā

be-shajar shahr meñ ghar us kā kahāñ tak DhūñDeñ
vo jo kahtā thā ki āñgan meñ sanobar hogā

jaltī jaatī haiñ jaḌeñ sūkhte jaate haiñ shajar
ho jo taufīq to aañsū hī koī dam barsā

log saa.e aur shajar se is qadar bezār haiñ
shāḳh ko bhī kāTte haiñ shāḳh par hote hue

vahī charāġh bujhā jis kī lau qayāmat thī
usī pe zarb paḌī jo shajar purānā thā

dushvāriyāñ kuchh aur ziyāda hī baḌh ga.iiñ
ghar se chale to raah meñ itne shajar mile

maiñ shajar huuñ mausam-e-dard kā yahī rut hai mere liye sadā
kabhī shāḳh shāḳh harī milī kabhī barg barg judā milā

jin ke āñgan meñ amīrī kā shajar lagtā hai
un kā har aib zamāne ko hunar lagtā hai

na.ī duniyā na.e manzar na.e afkār mile
sab shajar naql-e-makānī ke samar-bār mile

kahāñ jaatī haiñ bārish kī duā.eñ
shajar par ek bhī patta nahīñ hai

kyā safar kis kā makāñ kaisī havā kis kā shajar
tezī-e-par ga.ī ḳhas-raizī-e-minqār ga.ī

bun rahe haiñ urūs-e-gul kā kafan
magas-e-barg o ankabūt-e-shajar

sunte haiñ vo shajar bhī suukh gayā
jis pe sayyād āshiyāna thā

nau-shagufta ik shajar kā qad nikalnā hai qayāmat
aur us kā be-ḳhabar honā javāñ hote hue bhī

use ye shauq gahrī dhund lipTe har shajar se
mujhe ye fikr kaise bad-gumānī ḳhatm hogī

kaafī na thā jamāl-e-ruḳh-e-sāda-e-bahār
zebā.ish-e-giyāh-o-shajar kar rahe haiñ ham

gar shajar meñ samar nahīñ mumkin
us meñ saayā hī shāḳh-bhar rakh de

chand-lamhe koī to sustā le
raah meñ ek do shajar rakh de

dostī dhuup se hī kar lī jab
raah meñ tab ghanā shajar aayā