Tags-Sher

maiñ savā sher ke kuchh aur samajhtā hī nahīñ
dam-ba-dam hai yahī diin o dil o īmāñ merā

kuchh sher-o-shā.erī se nahīñ mujh ko fā.eda
illā husūl-e-kāvish-e-be-jā-e-ḳhalq hai

kahīñ ḳhuddāriyāñ tanhā.iyoñ se jheñp jaatī haiñ
mire kuchh sher paḌh lenā maza aa jā.egā tujh ko

ab tak to sher-goī pe qaane rahā magar
tū bhī 'shakeb' ayaaz koī toḌ-joḌ kar

ye terā rañg-e-suḳhan terā bāñkpan ai 'shāz'
ki sher raas to aa.e anā bhī raas aa.e

yuuñ mirā soz-e-jigar duniyā meñ rusvā ho gayā
sher-o-naġhma rañg-o-nik.hat jām-o-sahbā ho gayā

ġhazal kahī hai ki motī piro.e haiñ ai 'nazm'
vo kaun sher hai jo durr-e-shāhvār nahīñ

ghul jaa.e sher meñ to zamīñ āsmāñ bane
vo husn-e-lā-zavāl jo sachchā.iyoñ meñ hai

ye jam.a o ḳharch zabānī hai naqd-e-sher-o-suḳhan
magar yahī to kamā.ī hai zindagī bhar kī

shikan shikan tirī yādeñ haiñ mere bistar kī
ġhazal ke sher nahīñ karvaTeñ haiñ shab bhar kī

phir ḳhayāl aatā hai shāyad maiñ ġhalat-āmoz huuñ
jo sher-goī ko ibādat jaan kar itrā rahā huuñ

na ham ko sher-o-suḳhan se matlab na ishrat-e-anjuman se matlab
kisī ko 'iqbāl' dāstān-e-ġham-e-mohabbat sunā rahe haiñ

ye tire sher tirā husn-e-taġhazzul 'as.ad'
tire sheroñ se jo shādāñ na huā thā so huā

tū merī nigāhoñ meñ jise DhūñDh rahā hai
vo husn mire sher ke parde meñ chhupā hai

hamāre sher meñ roTī kā zikr bhī hogā
kisī kisī ke shikam hī na ho to kyā kiije

yuuñ to ustād-e-fan-e-sher bahut se guzre
kis ko kahte haiñ ġhazal-goī 'asar' 'mīr' se pūchh

kisī bhī sher ko hāsil huī na zarḳhezī
maiñ DhūñDhtā rahā sahrāoñ meñ numū ab tak

maiñ dasht-e-sher meñ yuuñ rā.egāñ to hotā rahā
isī bahāne magar kuchh bayāñ to hotā rahā

vasl kis ko nasīb hotā hai
'dāġh' ke sher par guzārā kar

dard ne dil kī parvarish kī hai
dard hī sher se adā hogā