Tags-Sher

kyā sunā.eñ tumheñ koī taaza ġhazal
sher hairat-zada ābdīda ġhazal

pā.ūñ kis se mazāq-e-sher kī daad
aaj 'faizī'-o-'kālīdās- nahīñ

sher kahne meñ burā.ī kuchh nahīñ
bas nayā andāz honā chāhiye

is ishq ke dard kī kaun davā magar ek vazīfa hai ek duā
paḌho 'mīr'-o-'kabīr' ke bait kabit suno sher-e-'nazīr' faqīr-o-ġhanī

ye sher-goī vo ḳhud-farāmosh kaifiyat hai jahāñ ḳhudī kā guzar nahīñ hai
ḳhudī kī bāz-āvarī se pahle jo be-ḳhudī kī ḳhud-āgahī hai vo shā.irī hai

adab kī soch yahī hai tumhārā tiir nahīñ
tumhārā sher dil-o-jān meñ utar jaa.e

ik aisā vaqt bhī aatā hai chāñdnī shab meñ
mirā dimāġh mirā dil kahīñ nahīñ hotā

terī furqat meñ mire sher haiñ kitne ġhamgīñ
muskurātī huī nazroñ se hañsā de aa kar

sher-goī hai vo shai jin kā sila dene ko
ḳhvāb-e-firdausī-e-ḳhush-fikr meñ rustam aayā

ġhazal kā sher un par bhī asar-andāz hotā hai
miyāñ 'ulfat' magar har baar aisā kyuuñ nahīñ hotā

dar pe us parda-nashīñ ke ho to bā-saut-e-buland
sher us vaqt hai 'jur.at' se paḌhāne kā mazā

vo ek sher jo khultā hai saarī mahfil pe
vo jis pe khulnā hai us pe magar nahīñ khultā

tāsīr meñ kam ho to karūñ sher ko bhī aaq
ātish meñ jo kam ho vo rag-e-tāk jalā duuñ

ik nazar tanqīd kī paḌne kī 'ārif' der thī
sher jitne the ġhazal meñ sab rasīle ho ga.e

sher-goī kī mayassar hai farāġhat ab kise
dām-e-duniyā meñ phañse ham āb-o-dāne ke liye

sahn masjid kā hai aur 'hāfiz'-o-'ḳhayyām' ke sher
jām-e-ġhāyab meñ magar rañg hai mai-ḳhāne kā

laakh duniyā ne mire sher pe dī daad to kyā
jis kī ḳhātir thā likhā us ko sunāyā na gayā

mere jazbāt āñsuoñ vaale
sher sab hichkiyoñ se likhtā huuñ

un ko dīvān se nikāl diyā
sher jo apne hasb-e-hāl hue

muḌ ke dekhā bhī nahīñ dil ke lahū kī jānib
sher kī daad ye dī husn-e-bayāñ tak pahuñche