Tags-Shokhi

tabassum kī bijlī qayāmat kī shoḳhī
ye bārāñ hai bādal hai kaḌkan hai kyā hai

garm-joshī se jalāyā kare kashf o ḳhirman
barq ho saktī nahīñ shoḳhī meñ saanī terī

sab poch hai zāhir kī ye shoḳhī-o-sharārat
ma.ashūq meñ jab tak ki na ho zaat kī garmī

shoḳhī shabāb husn tabassum hayā ke saath
dil le liyā hai aap ne kis kis adā ke saath

apnī is shoḳhi-e-raftār kā anjām na soch
fitne ḳhud uThne lage tū ne uThā.e to nahīñ

roktā huuñ kabhī shoḳhī se to har tifl-e-sarishk
ro ke kahtā hai abhī ghar se nikal jā.ūñgā

us kī shoḳhī kā hai ta.ajjub kyā
husn ye kuchh aur us pe ain shabāb

ik jhalak bhī yaar kī shoḳhī kī tujh meñ nahīñ ai barq
tispe ham-sar ho to us kī tundi-e-ḳhū se che-ḳhush

hañsne meñ rone kī aadat kabhī aisī to na thī
terī shoḳhī ġham-e-furqat kabhī aisī to na thī

bā.īñ hama-sādgī hai purkārī bhī
shoḳhī bhī hai is meñ ayyārī bhī

ġhazal ke dil-rubā lahje kī shoḳhī
suḳhan kā silsila detī hai ab bhī

maiñ ki huuñ ādam-e-āzaim kī rivāyat kā naqīb
merī shoḳhī sabab-e-dar-ba-darī rahnā thī

saj-dhaj nigah akaḌ chhab husn-o-adā-o-shoḳhī
nām-e-ḳhudā haiñ tujh meñ ai naujavān āThoñ

vaah kyā kahnā mujassam kar diyā mauhūm ko
naqsh-bandān-e-azal kī shoḳhi-e-tahrīr ne

kauñdtī hai hazār rañg se barq
phir bhī shoḳhī tirī nahīñ aatī

har baat meñ us kī garmī hai har naaz meñ us ke shoḳhī hai
qāmat hai qayāmat chaal parī chalne meñ phaḌak phir vaisī hī

shoḳhī to ye hai bazm meñ baiThe haiñ is tarah
goyā khiñchā huā hai muraqqa.a hijāb kā

hosh meñ lā ke mire hosh uḌāne vaale
ye tirā naaz hai shoḳhī hai adā hai kyā hai

bijlī chamak ga.ī jo hañsī meñ phaḌak ga.e
shoḳhī bharī huī hai tumhārī sarisht meñ