Tags-Sukoon

bikharte phūloñ na ham se pūchho hameñ to ab yaad hī nahīñ hai
chalo ye ahl-e-chaman se pūchheñ sukūn kyā hai qarār kyā hai

sukūn-e-dil to kahāñ rāhat-e-nazar bhī nahīñ
ye kaisī bazm hai jis meñ tirā guzar bhī nahīñ

ḳhudā kī ḳhaas ne.amat hai sukūn-e-jān-o-dil 'tāriq'
pareshānī meñ daulat kī farāvānī se kyā hogā

'tābish' sukūn-e-dard se taskīn-e-marg tak
dil ho agar to laakh haiñ pahlū qarār ke

jise samajhtā thā maiñ dil-navāz jab us se
sukūn-e-qalb na paayā to aañkh bhar aa.ī

ye kaam us ke liye jaise mas.ala hī na thā
vo pur-sukūn thā kār-e-muhāl karte hue

niiñd sapne sukūn ummīdeñ
kitnā nuqsān kar rahī ho nā

sukūn-e-dil ke liye ishq to bahāna thā
vagarna thak ke kahīñ to Thahar hī jaanā thā

sukūn-e-zāt vaqf-e-intishār kar liyā gayā
ġhazab huā ki dil kā e'tibār kar liyā gayā

ye jo zindagī kī haiñ gutthiyāñ ye sulajh ke bhī na sulajh sakīñ
haiñ agarche vaj.h-e-sukūn ham yahāñ shādmāñ koī aur hai

sukūn-e-dil nahīñ jis vaqt se us bazm meñ aa.e
zarā sī chiiz ghabrāhaT meñ kyā jaane kahāñ rakh dī

roz naqsha banā ke duniyā kā
rañg-e-amn-o-sukūn bhartā huuñ

sukūn-e-sīna-e-tūfāñ 'mujīb' kyā shai hai
ye jāniye to na sāhil kī aarzū karte

jis qadar qalb kī taskīn ke sāmāñ hoñge
karb afzā-e-sukūn-e-ġham-e-hijrāñ hoñge

sukūn-e-zindagī tark-e-amal kā naam hai shāyad
na ḳhush hotā huuñ āsāñ se na ghabrātā huuñ mushkil se

barbād sukūn-e-dar-o-dīvār na ho
be-hurmatī-e-kūcha-o-bāzār na ho

raḳht-e-safar meñ bāñdh leñ pur-shor kuchh bhañvar
dariyā hai pur-sukūn safar be-maza na ho

ye aur baat ḳhud ko bikharne nahīñ diyā
yādeñ ḳhalal to Daal rahīñ thiiñ sukūn meñ

parastish apnī anā ke butoñ kī kar lī bahut
sukūn-e-dil ke liye ik ḳhudā zarūrī hai

zamīñ kī god meñ itnā sukūn thā 'anjum'
ki jo gayā vo safar kī thakān bhuul gayā