Tags-Tamanna

tum aao taar se marqad pe ham qadam chūmeñ
faqat yahī hai tamannā tirī qasam baaqī

ġharīb-e-shahr-e-tamannā asīr-e-dām-e-firāq
taḌap rahā hai sar-e-jāda ham-safar ke liye

duniyā tujhe chāhe kuchh bhī kahe ham jān-e-tamannā kahte haiñ
ham terī nazar meñ ġhair sahī phir bhī tujhe apnā kahte haiñ

naza.a meñ us ne is andāz se dekhā mujh ko
marte marte huī jiine kī tamannā mujh ko

hameñ bazm-e-adū meñ vo bulāte haiñ tamannā se
karam aisā bhī hotā hai sitam aisā bhī hotā hai

ham zindagī se apnī bichhaḌ kar bhī jī rahe
kyā ḳhaak ab qazā kī tamannā kareñge ham

thī jin se kuchh umīd-e-vafā vo badal ga.e
hargiz na ab kisī kī tamannā kareñge ham

jazba-e-ishq meñ jannat kī tamannā kaisī
ye bulandī to mirī gard-e-safar hotī hai

ham na māneñge ḳhamoshī hai tamannā kā mizāj
haañ bharī bazm meñ vo bol na paa.ī hogī

siine meñ soz-e-marg-e-tamannā na pūchhiye
marghaT meñ jaise uThte hoñ sho.ale chitāoñ ke

tasvīr banī dekhī ik jān-e-tamannā kī
aañsū mirī āñkhoñ meñ kyā silsila-vār aa.e

ham bāġh-e-tamannā meñ din apne guzār aa.e
aa.e na bahār āḳhir shāyad na bahār aa.e

dil ko aayā hai phir kisī kā ḳhayāl
phir tamannā javān hotī hai

tamannā aarzū armān hasrat
parinde uḌ ga.e par phaḌphaḌā ke

hai bār-e-samā.at use iz.hār-e-tamannā
ye hāl-e-zabūñ us ko sunā bhī nahīñ saktā

paañv nañge haiñ har tamannā ke
sar pe ab ke ridā rahe na rahe

maiñ dasht-e-tamannā meñ bas ik baar ga.ī thī
us vaqt se riste haiñ mire paañv ke chhāle

maiñ kaise tai karūñ be-samt rāstoñ kā safar
kahāñ hai shahr-e-tamannā koī patā to de

dekhā use to aks-e-tamannā chamak uThe
is shahr-e-sañg meñ vo mujhe aa.inā lagā

hasrat-e-arz-e-tamannā yaañ se samjhā chāhiye
do-jahāñ hashr-e-zabān-e-ḳhushk haiñ juuñ shāna ham