Tags-Tamanna

koī tamannā koī masarrat dil ke qarīb aane hī na dī
kis ne kī hai ishq meñ yaaro ġham se mohabbat ham se ziyāda

bazm-e-qadah se aish-e-tamannā na rakh ki rañg
said-e-ze-dām-e-jasta hai us dām-gāh kā

terī talāsh terī tamannā to maiñ bhī huuñ
jaisā tirā ḳhayāl hai vaisā to maiñ bhī huuñ

shahd-shikan hoñToñ kī larzish ishrat baaqī kā gahvāra
dā.era-e-imkān-e-tamannā narm lachaktī bāñhoñ ke ḳham

mire dil ko na mal talvoñ se apne meñ ye Dartā huuñ
kahīñ aisā na ho us meñ koī ḳhār-e-tamannā ho

batā.ūñ kyā kisī ko maiñ ki tum kyā chiiz ho kyā ho
mirī hasrat mire armān ho merī tamannā ho

ai tīrgī-e-shahr-e-tamannā batā bhī de
vo chāñd kyā hue vo sitāre kidhar ga.e

aisā bhī koī shahr-e-tamannā hai zamīñ par
luTne kā jahāñ ḳhauf na andesha-e-jāñ hai

kahīñ se koī tamannā duā meñ aa na sake
mire ḳhudā tū mire dil ko be-zabāñ kar de

'sīmāb' dil havādis-e-duniyā se bujh gayā
ab aarzū bhī tark-e-tamannā se kam nahīñ

hai tamannā kisī se milne kī
maut to ai 'jigar' bahānā hai

kabhī vafūr-e-tamannā kabhī malāmat ne
thakā diyā hai badan roz kī ḳhajālat ne

hai tamannā tumhārī sab ko magar
tum ho aap apnī aarzū pyāre

abhī to harf-e-tamannā likhā nahīñ maiñ ne
abhī se kyuuñ varaq-jāñ hai paara paara mirā

arsa huā ki bazm-e-tamannā ujaḌ chukī
pahlī sī ab vo raunaq-e-shām-o-sahar kahāñ

vo rañg nahīñ sho.ala-e-ehsās meñ 'bāqī'
ham sāz-e-tamannā se ham-āhañg nahīñ kyā

havās luuT liye shorish-e-tamannā ne
harī rutoñ ke liye ban ga.e haiñ dīvāne

zulf-e-ḳhamdār meñ nūr-e-ruḳh-e-zebā dekho
chashm-e-baddūr mirā husn-e-tamannā dekho

be-sabab zulm kī āñdhī na chalāo mujh par
yuuñ ujaḌ jā.egā gulzār-e-tamannā dekho

duniyā ko kyā ḳhabar? mirī duniyā phir aa ga.ī
vo rūh-e-nāz o jān-e-tamannā phir aa ga.ī