Tags-Tamanna

vahī le ga.e haiñ sakūñ zindagī kā
jinheñ har tamannā bulāne lagī hai

samajh liyā jise auroñ ne 'ashk' nā-mumkin
usī ko apnī tamannā banā liyā maiñ ne

tamām umr jise raushnī samajhte rahe
fareb-e-chashm-e-tamannā thā raushnī to na thī

jis ḳhvāb meñ rū-posh ho jiine kī tamannā
vo ḳhvāb-e-dil-āvez bikharne nahīñ denā

vasl-e-mau.ūd se āshob-e-tamannā hai adam
be-tamannā tirā āshufta-e-hijrāñ na huā

un kitāboñ pe to ham ne bhī kiyā hai kuchh kaam
jin meñ ik harf-e-tamannā bhī dikhā.ī na diyā

aur ishrat kī tamannā kyā kareñ
sāmne tū ho tujhe dekhā kareñ

ahbāb haiñ mai-ḳhāna hai pahlū meñ hai ma.ashūq
ab hazrat-e-'shañkar' ko tamannā se ġharaz kyā

sar-tā-ba-qadam banda-e-taslīm-o-razā huuñ
mujh āshiq-e-sādiq ko tamannā se ġharaz kyā

koī paiġhām-e-tamannā koī paiġhām-e-amal
sirf kah dene se to duniyā meñ kuchh hotā nahīñ

jab jab vo sar-e-tūr-e-tamannā nazar aayā
maiñ kaise kahūñ vo mujhe kyā kyā nazar aayā

shāyad rag-e-jāñ toḌ ke niklī hai tamannā
ḳhvāboñ ne koī bazm sajā lī hai to kyā hai

yahāñ to kaam tamannā hī meñ tamām huā
magar unhoñ ne na pūchhā ki aarzū kyā hai

dil kā vīrāna bhī vahī hai terī tamannā bhī hai vahī
zulmat meñ raushan hai sitāra sahrā meñ jaltā hai alaao

pās-e-vahshat hai to yād-e-ruḳh-e-lailā bhī na kar
ishq ko qaidī-e-zanjīr-e-tamannā bhī na kar

ye ghar sarāb-e-tamannā dikhā.ī detā hai
jise bhī dekhiye pyāsā dikhā.ī detā hai

sīñchte rahiye use ḳhūn-e-jigar se aksar
be-samar varna tamannā kā shajar rahtā hai

tum hāl-e-pareshāñ kī pursish ke liye aate
sahrā-e-tamannā meñ mela sā lagā hotā

jab dil meñ zarā bhī aas na ho iz.hār-e-tamannā kaun kare
armān kiye dil hī meñ fanā armān ko rusvā kaun kare

jab dil thā shagufta gul kī tarah Tahnī kāñTā sī chubhtī thī
ab ek fasurda dil le kar gulshan kī tamannā kaun kare