Tags-Tanhai

siskiyoñ ne chaar sau dekhā koī Dhāras na thī
ek tanhā.ī thī us kī god meñ sar rakh liyā

be-maqsad mahfil se behtar tanhā.ī
be-matlab bātoñ se achchhī ḳhāmoshī

tanhā.ī se sahrā se na dariyā ke bhañvar se
vahshat mujhe hotī hai mire apne hī ghar se

din-Dhale hogā jashn-e-tanhā.ī
iltijā hai ġhamoñ se shirkat kī

badan pe jamne na dī ham ne gard-e-tanhā.ī
ḳhayāl-e-anjuman-e-dostāñ ke saath rahe

kis ke liye pairoñ ko aziyyat meñ rakhā jaa.e
ḳhud DhūñD ke tanhā.ī chalī aa.ī hai ghar meñ

tujh se kahne kī koī baat na karnā tujh se
kunj-e-tanhā.ī meñ bas ḳhud ko alāmat karnā

vasl meñ ḳhālī huī ġhair se mahfil to kyā
sharm bhī jaa.e to maiñ jānūñ ki tanhā.ī huī

maiñ ne chāhā thā ki bilkul hī akelā ho jā.ūñ
so gayā ġham ga.ī ishrat ga.ī tanhā.ī bhī

saath ulfat ke mile thoḌī sī rusvā.ī bhī
vasl ke baad mujhe chāhiye tanhā.ī bhī

to phir ikrām kyā shai hai jo tanhā.ī meñ tanhā huuñ
koī mahfil atā kar qā.ede kī us meñ tanhā kar

sochtī huuñ maiñ yahī baiTh ke tanhā.ī meñ
kyā yaqīñ kar ke tirā maiñ ne himāqat kī hai

tanhā.ī meñ jab dam ghuTne lagtā hai
terī tahrīroñ kā amrit piitā huuñ

jaane kis manzil-e-be-nām kī jānib niklūñ
apnī tanhā.ī se Dartā huuñ mire saath raho

terī qurbat meñ guzāre hue kuchh lamhe haiñ
dil ko tanhā.ī kā ehsās dilāne vaale

ek tasvīr se rahtā huuñ muḳhātab ghanToñ
jab bhī tanhā.ī ke hālāt meñ Dar lagtā hai

ik pal meñ kyā kuchh badal gayā jab be-ḳhabroñ ko ḳhabar huī
maiñ tanhā.ī meñ chhupā rahā jab mujh par us kī nazar huī

dasht-e-tanhā.ī meñ jiine kā salīqa sīkhiye
ye shikasta bām-o-dar bhī ham-safar ho jā.eñge

alif lafz o ma.ānī se mubarrā
alif tanhā.ī kā raushan hayūlā

mizha pe hotā hai raushan charāġh-e-tanhā.ī
asīr-e-zulf agar anjuman se jaatā hai