Tags-Tanhai

dekh kar merā dasht-e-tanhā.ī
rañg-e-rū-e-bahār utrā hai

maiñ ne ḳhushī se kī hai ye tanhā.ī iḳhtiyār
mujh par lagā ke vo koī qadġhan nahīñ gayā

hai kahāñ kisht-e-kufr dasht-e-ḳhayāl
duur tak maiñ huuñ aur tanhā.ī

chāñd Duubā to ye sazā paa.ī
baat karne lagī hai tanhā.ī

ik ālam-e-tanhā.ī hai kuchh dekhā huā sā
shāyad ki maiñ apne hī bayābāñ meñ khaḌā huuñ

koī tanhā.ī kā ehsās dilātā hai mujhe
maiñ bahut duur huuñ nazdīk bulātā hai mujhe

maiñ ālam-e-tanhā.ī meñ niklā huuñ safar par
phir gardish-e-ayyām kahīñ saath na ho le

ham pe tanhā.ī meñ kuchh aaise bhī lamhe aa.e
ban ga.e aap kī tasvīr hamāre saa.e

lū ho sabā ho yā purvā.ī sab ke saath chalo
sab haiñ said-e-rah-e-tanhā.ī sab ke saath chalo

sach hai tanhā.ī meñ insān sanak jaatā hai
roz-e-raushan ko siyah-fām likhā hai us ne

naam badnām hai nāhaq shab-e-tanhā.ī kā
vo bhī ik ruḳh hai tirī anjuman-ārā.ī kā

tanhā.ī meñ dil kā sahārā ek havā kā jhoñkā thā
vo bhī gayā hai sū-e-bayābāñ us kā aanā mushkil hai

tere siine meñ bhī ik daaġh hai tanhā.ī kā
jāntā maiñ to kabhī duur na hotā tujh se

chāñdnī-rāt kī mahkī huī tanhā.ī meñ
sāz-e-ġham par koī gaatā hai to ro lete haiñ

tanhā.ī-e-firāq meñ ummīd bār-hā
gum ho ga.ī sukūt ke hañgāma-zār meñ

ḳhvāboñ se udhar kī masāfat meñ jo guzrī hai kyā pūchhte ho
ik vahshat chār-pahar kī thī ik jaltī huī tanhā.ī thī

taaq thā ḳhvāb thā tanhā.ī thī tārīkī thī
raat ne sirf charāġhoñ ko chhupā.e rakkhā

hāsil-e-kunj-e-qafas vahm-ba-kaf tanhā.ī
raunaq-e-shām-e-safar tā-ba-sahar sannāTā

merī chādar to chhinī thī shaam kī tanhā.ī meñ
be-ridā.ī ko mirī phir de gayā tash.hīr kaun

merī tanhā.ī
dīvār ban ke khaḌī hai!