Tags-Tanhai

aao tum hī karo masīhā.ī
ab bahaltī nahīñ hai tanhā.ī

añgḌā.ī par añgḌā.ī letī hai raat judā.ī kī
tum kyā samjho tum kyā jaano baat mirī tanhā.ī kī

kabhī dahshat ne bigāḌe the par ab tanhā.ī
ḳhud mire baal banātī hai chalī jaatī hai

tanhā.ī ke saa.e bazm meñ bhī pahlū se judā jab ho na sake
jo umr kisī ke saath kaTī us umr kā pal pal yaad aayā

tanhā.ī se bachāv kī sūrat nahīñ karūñ
mar jā.ūñ kyā kisī se mohabbat nahīñ karūñ

tanhā.ī meñ ab un kā bhī dam ghuTne lagā hai
hijrat ko samajhte the jo āsān mirī jaañ

jaane maiñ kaun thā logoñ se bharī duniyā meñ
merī tanhā.ī ne shīshe meñ utārā hai mujhe

tum ko saudā-e-mahfil-ārā.ī
aur hameñ justujū-e-tanhā.ī

dekhnā ye ishq meñ husn-e-pazīrā.ī ke rañg
anjuman-dar-anjuman hoñ merī tanhā.ī ke rañg

tanhā.ī ke bojhal lamhe ham is tarah bitāte haiñ
dil ham ko detā hai tasallī ham dil ko samjhāte haiñ

soz-e-dil se gosha-e-tanhā.ī meñ kyā fā.eda
is tarah jaliye charāġh-e-rahguzar ho jā.iye

merī āñkhoñ ko kar ke atā ratjage
merī tanhā.ī sotī rahī raat bhar

ek zarā sī der huī kyā us kī galī tak jaane meñ
tanhā.ī kī shakl meñ ab tak bharte haiñ jurmāna ham

alam-bardār tanhā.ī thā apnā 'farhat-ehsās'
hujūm-e-shahr ke hāthoñ jo maarā jā rahā hai

simaTtī phailtī tanhā.ī sote jāgte dard
vo apne aur mire darmiyān chhoḌ gayā

maiñ bazm se ḳhākistar-e-dil le ke chalā huuñ
aur sāmne tanhā.ī ke sahrā kī havā hai

shikan-e-bistar-o-namnākī-e-bārish haiñ gavāh
pūchh lo un se fasāna shab-e-tanhā.ī kā

sar ūñchā ūñchī tanhā.ī
qadmoñ meñ begāna aadam

rahūñ jo ghar meñ to tanhā.ī kāTne aa.e
chalūñ jo raah to vahshat ziyāda hotī hai

bhūlā nahīñ ehsās tire lams kī ḳhushbū
tanhā.ī meñ anfās mahakte hue dekhā