Tags-Tanz

naġhmoñ ne mire dhuum machā dī hai chaman meñ
'jāved' maiñ ik tanz pai-e-nauha-girāñ huuñ

vo dushmanoñ ke tanz ko Thukrā ke pī ga.e
maiñ dostoñ ke ġhaiz ko bhaḌkā ke pī gayā

lahje kī narmiyoñ se 'qamar' merā rābta
un ko aziiz tanz ke nashtar tarāshnā

zarīf abrū ġhazab ġhamza ġhussa ġhaur ġhazal
ghamanD qaus qazā ishq tanz niim saḳhī

sāqiyā tanz na kar chashm-e-karam rahne de
mere sāġhar meñ agar kam hai to kam rahne de

tanz kartā huā guzrā thā havā kā jhoñkā
tab se ham tez havāoñ meñ jalāte haiñ charāġh

aaj bhī harf-e-tasallī hai shikast-e-dil pe tanz
kitne jumle haiñ jo har mauqa.a pe dohrā.e ga.e

jis ke lahje meñ ho shā.istagī-e-tañz-e-latīf
aisā shā.er hī zarīf-e-azalī hotā hai

saarī duniyā mutalātim nazar aatī hai 'nadīm'
mujh pe ik tanz huā rauzan-e-zindāñ na huā

pahan ke dost bhī nikle libās-e-tanz 'hasan'
vo apnī aan meñ be-qā.ida huā so huā

ta.an tanz āvāze sun rahe ho ab bolo
bolne ke ḳhamiyāze sun rahe ho ab bolo

kareñ e'tibār kisī pe kyā ki ye shahr shahr-e-nifāq hai
jahāñ muskurāte haiñ lab kahīñ vahīñ tanz hai kisī baat meñ

jaise jaise vo tanz karte haiñ
vaise vaise nikhar rahe haiñ ham

merī kam-goī pe jo tanz kiyā karte haiñ
merī kam-goī ke asbāb se nā-vāqif haiñ

har ik gaam pe us kī galī meñ tanz ke patthar chalte haiñ
us kī galī meñ ānā-jānā aap ke bas kī baat nahīñ

bahut ḳhulūs jhalaktā hai tanz meñ us ke
vo mujh pe tanz ke nashtar chalā bhī detā hai

muskurāhaT meñ koī tanz bhī ho saktā hai
ye masarrat kī alam-dār ho aisā bhī nahīñ

ye saare tanz ye ta.ane ye rishte naate sab
kahāñ chhupeñge jo merī zabān niklegī

chup haiñ 'ravish' ab arbāb-e-dānish
the tanz kyā kyā ahl-e-junūñ par

kyā tanz-e-daurāñ kyā hūr-e-ḳhūbāñ
dil hī sitam-kash dil hī sitamgar