Tags-Tasawwur

ek chehra hai jo āñkhoñ meñ basā rahtā hai
ik tasavvur hai jo tanhā nahīñ hone detā

hai tasavvur doyamī mauj-e-ḳhayāl
farsh se tā-arsh jis kī hai tarañg

sabza bhī chāhtī haiñ tasavvur kī ḳhaak par
vo āñkheñ jin ko nam bhī nahīñ kar sakūñgā maiñ

tasavvur terī sūrat kā mujhe har shab satātā hai
kabhū paas aa.e hai mere kabhū phir bhaag jaatā hai

ek yaad ik tasavvur-e-rafta
sīna-e-māh se ubhartā hai

ik tasavvur se tire mahkā hai merā añg añg
tū mire ehsās meñ bastā hai ḳhushbū kī tarah

kaaTī jahāñ tasavvur-e-jānāñ meñ ek shab
kahte haiñ log us jagah but-ḳhāne ban ga.e

tasavvur un kā hai mujh ko har-dam na shab ko taskīñ na chain din ko
hoī haiñ auqāt mere bilkul tabāh kākul ḳharāb-e-āriz

phir tasavvur meñ chalī aa.ī mahaktī huī shab
aur simTī huī be pairahanī yaad aa.ī

hai to aalam kī ḳhabar apnī ḳhabar ḳhaak nahīñ
ab tasavvur meñ hī khultā hai darīcha apnā

kahāñ hai shām-e-tamannā malāhatoñ kā vo rañg
kahāñ haiñ sub.h-e-tasavvur sabāhateñ terī

kyā huiiñ fikr-o-tasavvur kī tire ra.anā.iyāñ
hādisa aisā bhī kyā 'tanvīr' tum par ho gayā

jī DhūñDtā hai phir vahī fursat ki raat din
baiThe raheñ tasavvur-e-jānāñ kiye hue

ro rahā huuñ isī tasavvur meñ
dī thī ye mujh ko zindagī kaisī

shab kī ḳhāmoshī meñ hai terā tasavvur terī yaad
haa.e kyā sāmān-e-taskīn-e-dil-e-ranjūr hai

ḳhushk hoñToñ ke tasavvur se larazne vaalo
tum ne taptā huā sahrā kabhī dekhā hī nahīñ

tasavvur kar tirā husn-e-araq-nāk
mirī āñkheñ haiñ gauhar-bār mohan

tum hī aaoge mirī ruuh meñ ḳhushbū ban kar
ye tasavvur bhī ajab rāhat-e-jāñ hotā hai

din bhar hai tasavvur hai magar baat ko ronā
karte haiñ miyāñ dekhiye ye dīda-e-tar kyā

bichhaḌ ke bhī to tasavvur meñ tere ā.ūñgā
magar bichhaḌne kā tujh ko ḳhayāl kyuuñ aayā