Tags-Tasweer

Thikānā pūchhte haiñ sab tumhārā mujh se aa aa kar
koī tasvīr do aisī lagā duuñ maiñ dar-e-dil par

yahī mahsūs hotā hai ajantā kī guphāoñ meñ
ki har tasvīr to chup hai fan-e-tasvīr bole hai

miltī hai ḳhushī sab ko jaise hī kahīñ se bhī
bhūlī hui bachpan kī tasvīr nikaltī hai

hai har ik sher yaar kī tasvīr
fikr apnī ḳhayāl-e-mānī hai

kisī kī hasīñ shoḳh āñkhoñ meñ yaaro mirī yaad meñ jhilmilātī to hogī
sahelī ko tasvīr merī dikhā kar vo sharmā ke ḳhud jheñp jaatī to hogī

aa.ī na dekhne meñ bhī tasvīr yaar kī
ā.īna darmiyān meñ dīvār hī rahā

maiñ ne tirī tasvīr ko kyā rañg diye haiñ
andāz badal detā hai lafzoñ ke ma.ānī

yuuñ ho agar 'farāz' to tasvīr kyā bane
ik shaam us ke saath lab-e-jū piye hue

tasvīr kā har rañg nazar meñ hai
kyā baat tire dast-e-hunar meñ hai

yaañ ba-rañg-e-paikar-e-tasvīr ham ḳhāmosh haiñ
guftugū kī tum dikhāte ho vahāñ tarrāriyāñ

surḳhī ke saath aam sā be-sharh vāqi.a
tasvīr meñ ajiib ma.ānī kā rañg hai

ham bhī ehsās kī tasvīr banā sakte the
kaash ham pe kabhī iz.hār kā dar vā hotā

kis qadar dilkash suhānī shaam hai barsāt kī
bolne vaalī hai ab tasvīr goyā raat kī

dillī ke na the kūche aurāq-e-musavvar the
jo shakl nazar aa.ī tasvīr nazar aa.ī

kamāl hai ye tasavvur kī mashq-e-paiham kā
tire hijāb kī tasvīr bhī utar aa.ī

sifārish ham-damoñ kī un kā jaate vaqt ye kahnā
ki jab taḌpe mirī tasvīr siine se lagā denā

apne dil se rusvā.ī kā ḳhauf nikāl
'az.har' ab tasvīr mirī dālān meñ rakh

chal diyā vo dekh kar pahlū mirī taqsīr kā
dūsrā ruḳh us ne dekhā hī nahīñ tasvīr kā

ek manzar meñ ḳhalā pur kiyā tanhā.ī ne
merā chehra vahīñ tasvīr meñ rakkhā gayā thā

mujh ko aksar udaas kartī hai
ek tasvīr muskurātī huī