Tags-Tasweer

ham ne ḳhud dekhī hai dast-e-ġhair meñ
terī to tasvīr bhī harjā.ī hai

ham pe tanhā.ī meñ kuchh aaise bhī lamhe aa.e
ban ga.e aap kī tasvīr hamāre saa.e

us kī poshāk nigāhoñ kā ajab hai ye fusūñ
ḳhush-bayānī mirī tasvīr huī jaatī hai

charḳh ko madd-e-nazar hai khīñchnā puurī shabīh
māh-e-nau to sirf ḳhāka hai tirī tasvīr kā

harf ko lafz na kar lafz ko iz.hār na de
koī tasvīr mukammal na banā us ke liye

be-hikāyat mire ehsās kī tasvīr magar
har zamāne kā banā.e koī unvān mujhe

kis hausle par tālib-e-dīdār hai aalam
āñkheñ to laḌā le koī tasvīr se pahle

tasvīr dikhā rahī hai kyā kuchh
rañgoñ kā rachāo kis taraf hai

har shaam ufuq kī duurī par koī sahmā sahmā phirtā thā
tasvīr jo us kī banā.ī to ḳhud apnī shakl banā.ī thī

raushnī us ke kisī ruḳh par bhī aa paatī nahīñ
zindagī dhundlī sī ik tasvīr hai tere baġhair

maiñ ne kāġhaz tirī tasvīr kā iisā ko diyā
nusḳha juuñ dete haiñ bīmār sab attāroñ ko

majāl-e-dīd hai 'sā.ib' na tāb-e-nutq mujhe
kisī ke sāmne tasvīr kī misāl huuñ maiñ

phir kyuuñ tirī tasvīr Dhalī ruuh meñ merī
afsūñ tirī āñkhoñ kā musavvar to nahīñ thā

ye sādgī jo rañgīn bhī hai ye ḳhāmushī jo taqrīr bhī hai
vo ek tarah se lagte haiñ tahrīr meñ bhī tasvīr meñ bhī

harī sunahrī ḳhaak uḌāne vaalā maiñ
shafaq shajar tasvīr banāne vaalā maiñ

āñkheñ taras rahī haiñ āñkheñ baras rahī haiñ
tasvīr ho ga.e haiñ palkoñ pe chaar lamhe

vo bastiyāñ jo tabāhiyoñ meñ numū kī tasvīr ban ga.ī haiñ
vajūd jin kā kahīñ nahīñ hai magar mirī ḳhaak meñ milegā

dekhe kab talak baaqī rahe saj-dhaj us kī
aaj jis chehra se tasvīr utarvā.ī hai

āñkheñ haiñ magar ḳhvāb se mahrūm haiñ 'mid.hat'
tasvīr kā rishta nahīñ rañgoñ se zarā bhī

kyā sochte rahte ho tasvīr banā kar ke
kyuuñ us se nahīñ kahte kuchh hoñT hilā kar ke