Tags-Tasweer

āñkhoñ se ḳhadd-o-ḳhāl nikāle na jā sake
har-chand pheñk dī tirī tasvīr phaaḌ ke

ḳhūn-e-dil jin kī gavāhī meñ huā nazr-e-vafā
rañg to vo uḌ ga.e ab kyā karūñ tasvīr kā

chhīne letī hai dil tirī tasvīr
vo adā hai ki jaan hai goyā

fankār tū agar hai to fan kā dikhā kamāl
tasvīr-e-yār tā-had-e-imkāñ sajā ke lā

ikaTThe kar ke terī dūsrī tasvīr khīñchūñgā
vo sab jalve jo chhan chhan kar tirī chilman se nikleñge

ek tasvīr jalānī hai abhī
haañ magar aañkh meñ paanī hai abhī

shām-e-hijrāñ jise hāthoñ meñ liye phirtī hai
kaun jaane ki vo tasvīr kahāñ hai ab ke

sūrat-e-savāl huuñ maiñ pūchho na merā matlab
maiñ apne mudda.ā kī tasvīr hū-ba-hū huuñ

maiñ ne to yūñhī raakh meñ pherī thiiñ uñgliyāñ
dekhā jo ġhaur se tirī tasvīr ban ga.ī

tasvīr-e-ġham-e-dil na kabhī maand paḌegī
miTtā huā har naqsh ubharne ke liye hai

rañg ḳhushbū aur mausam kā bahānā ho gayā
apnī hī tasvīr meñ chehra purānā ho gayā

jis ne use dekhā vo giraftār-e-balā thā
tasvīr kā ā.īna bhī hairāñ nazar aayā

jā-ba-jā aks merī āñkhoñ meñ ubhre jis kā
us kī tasvīr bhī ab dil se haTā dī jaa.e

ghar tirā laakh purānā sahī lekin 'anjum'
dekh tasvīr na ho jaa.e purānī us kī

dekhe na sune baat jo ushshāq kī apne
is but meñ nazar aatī hai tasvīr ḳhudā kī

par tol ke baiThī hai magar uḌtī nahīñ hai
tasvīr se chiḌiyā ko uḌā denā chāhiye

kahtā har ek hai tirī tasvīr dekh kar
is shakl is shabīh ke qurbān jā.iye

maiñ ik tasvīr meñ huuñ
laal

us ne an-dekhā an-sunā kar ke be-ta.alluq kiyā hai to ab ham
us kī tasvīr se nikāleñge āñsuoñ ke hisāb kī sūrat