Tags-Tasweer

hai tirī tasvīr kitnī be-hijāb
har kisī ke rū-ba-rū hone lagī

ek tasvīr salīqe se rakhī hai ghar meñ
baaqī har chiiz to bas yuuñ hī paḌī rahtī hai

ishq aur vasl do ruḳh ik tasvīr
raa.ī ko to samajh rahī hai pahāḌ

ruḳhsat-e-raqs bhī hai paañv meñ zanjīr bhī hai
sar-e-manzar magar ik boltī tasvīr bhī hai

aisī makrūh kahānī kī ye tasvīr hai jo
sunñe vaalī bhī nahīñ dekhne vaalī bhī nahīñ

tez āñdhī meñ ye bhī kaafī hai
peḌ tasvīr meñ bachā liyā jaa.e

aag jaltī hai gharoñ meñ yā koī tasvīr hai
yādgār-e-jurm-e-ādam ḳhākiyoñ ke sāmne

ye safīne jo ik lahr ke vāste apne apne bahāv meñ bahne lage
ik adhūrī masāfat kī tasvīr meñ phir koī rañg bharne palaT ā.eñge

ḳhanjaroñ kī thī numā.ish har galī har moḌ par
aur ham kamre meñ tasvīr-e-butāñ dekhā kiye

maiñ kyā karūñ koī tasvīr gar adhūrī hai
maiñ apne rañg to ab us meñ bharne vaalā nahīñ

ek āvāz na.ī kaan meñ gūñjī us dam
jab bhī tasvīr zamāne kī suhānī dekhī

taḳhayyul meñ kabhī jab aap kī tasvīr ubhrī hai
to kāġhaz par qalam kī nok se tahrīr hai

tasvīr tasavvur hī bas ek sahārā hai
furqat ne banā Daalā us kī mujhe saudā.ī

āñkhoñ meñ us ke partav haiñ
dil meñ jo tasvīr lagī hai

mahkī hai dīvār ki is par
sājan kī tasvīr lagī hai

khīñchī hai tasavvur meñ tasvīr-e-ham-āġhoshī
ab hosh na aane de mujh ko mirī be-hoshī

kis hairat-e-ā.īna ke naḳhchīr haiñ donoñ
tasvīr huā vo kabhī tasvīr huā maiñ

chauk meñ ik tasvīr lagā.ī phūloñ kī
dekhā dekhī chāroñ raste phuul hue

us ne is tarah utārī mire ġham kī tasvīr
rañg mahfūz to rah jaa.eñ pa manzar na rahe

sau dard ik tabassum-e-pinhāñ meñ band haiñ
tasvīr huuñ 'firāq' nashāt-e-hayāt kī