Tags-Tasweer

tasvīr-e-iztirāb sarāpā banā huā
phirtā huuñ shahr shahr unheñ DhūñDhtā huā

kahīñ aisā na ho kam-baḳht meñ jaan aa jaa.e
is liye haath meñ lete mirī tasvīr nahīñ

sust-paimān o be-niyāz sahī
husn tasvīr-e-intizār bhī hai

kyā vasl kī ummīd mire dil ko kabhī ho
us shoḳh kī tasvīr bhī jab mujh se khiñchī ho

kise gulshan se itnā ishq hai merī tarah gulchīñ
qafas meñ rakh ke tasvīr-e-gulistāñ kaun dekhegā

ḳhud to sākit hai misāl-e-tasvīr
jumbish-e-ġhair se hai raqs-kunāñ

ab yahī kaam hai tasvīr-numā.ī terī
aur phir pahroñ tujhe taktā rahūñ kāġhaz par

mustaqil diid kī ye shakl nazar aa.ī hai
dil meñ ab aap kī tasvīr utar aa.ī hai

maiñ ik adhūrī sī tasvīr thā udāsī kī
kiyā hai us ne mukammal tabāh kar ke mujhe

dekhne vaale faqat tasvīr-e-zāhir par na jā
har nafas ke saath duniyā dūsrī ho jā.egī

khich ga.ī dil-kashī-e-husn marī nazroñ meñ
jī bahalne ko milī aap kī tasvīr mujhe

be-takalluf ruḳh-e-zebā se uThā.e vo naqāb
husn ḳhud pā.egā ek paikar-e-tasvīr mujhe

jalva-e-husn ke mafhūm pe jab ġhaur kiyā
ek dhundlī sī nazar aa.ī hai tasvīr mujhe

vo mirī shakl mirā naam bhulāne vaalī
apnī tasvīr se kyā aañkh milātī hogī

koī tasvīr sajā legā to koī tahrīr
kyuuñ na ham naqsh-ba-dīvār abhī ho jaa.eñ

tanvīr-e-numūd-e-sub.h bhī hai aariz ke damakte jalvoñ meñ
zulfoñ ke machalte saa.e meñ tasvīr-e-savād-e-shām bhī hai

maanī ne jo dekhā tirī tasvīr kā naqsha
sab bhuul gayā apnī vo tahrīr kā naqsha

tumhārī bazm meñ hairat se hai koī tasvīr
koī adab se hai sākit diyā banā huā hai

aañkh bīnā.ī gañvā baiThī to
terī tasvīr se manzar niklā