Tags-Tasweer

halkī sī kamī karnā kal kamre kī zīnat meñ
tasvīr haTā denā aa.ina lagā rakhnā

be-tahāshā tirī tasvīr pe jaatī hai nigāh
jab koī kahtā hai taqdīr kā maarā mujh ko

us se jī bhar ke milī dād-e-tamannā mujh ko
jis ne tasvīr tirī dekh ke dekhā mujh ko

koī tasvīr ashkoñ se banā kar
fasīl-e-shahr par chipkā gayā thā

tār-tār-e-pairahan meñ bhar ga.ī hai bū-e-dost
misl-e-tasvīr-e-nihālī maiñ huuñ ham-pahlū-e-dost

dī nahīñ tasvīr apnī tū ne dīvāne ko jab
yuuñ kiyā vallāh us ne ḳhud ko hī tujh sā kiyā

jo lutf kabhī hāsil thā hameñ vo lutf chaman ke saath gayā
ab kunj-e-qafas meñ khīñchte haiñ tasvīr-e-ḳhyālī phūloñ kī

zarre zarre meñ nazar aatī hai tasvīr-e-sanam
sar-ba-sar rū-kash-e-sad-dair-o-haram hai ham ko

dekhne ko maiñ faqat itnā bachā huuñ ya.anī
mujh ko ik manzar-e-tasvīr meñ dekhā jaa.e

yuuñ tire husn kī tasvīr ġhazal meñ aa.e
jaise bilqīs sulemāñ ke mahal meñ aa.e

uThne hī ko hai beach se parda hijāb kā
mahfil tamām ālam-e-tasvīr ho na jaa.e

tū jo badle tirī tasvīr badal jaatī hai
rañg bharne meñ suhūlat nahīñ hotī mujh ko

ulfat milī ḳhulūs milā dostī milī
har dil meñ ham ko apnī hī tasvīr sī milī

aur jab vo le sakā mujh se na koī intiqām
Daal dī ik ḳhaak kī muTThī mirī tasvīr par

jaane kab tak tirī tasvīr nigāhoñ meñ rahī
ho ga.ī raat tire aks ko takte takte

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ḳhuun ho ho ke Tapaktā hai ye sau rañg se dil
tā kisī rañg meñ pahuñche tirī tasvīr talak

rah gayā huuñ ban ke ik tasvīr-e-ġham
ġham ke hāthoñ haa.e kyā aalam huā

sapne kī vaadī ko taj kar rūp-nagar meñ aayā kar
din ke phaile kāġhaz par apnī tasvīr banāyā kar

dīvār-e-ummīd Dhe rahī hai
tasvīr tirī kahāñ lagā luuñ