Tags-Tasweer

muntazir kab se tahayyur hai tirī taqrīr kā
baat kar tujh par gumāñ hone lagā tasvīr kā

dīvār par lagī huī tasvīr dekhnā
maazī kī dāstān kā ye iqtibās hai

lakīreñ khīñchte rahne se ban ga.ī tasvīr
koī bhī kaam ho, be-kār thoḌī hotā hai

mire aa.ine meñ jo tasvīr terī ubhar aa.ī hai
ye jhuTlāne se fā.eda? mujh ko ye raushnī lagtī hai

terī tā.īd kī tasvīr se jī uTThe the
nahīñ ma.alūm thā ye ret hai paanī ruḳhsat

zindagī bhar ke liye ruuTh ke jaane vaale
maiñ abhī tak tirī tasvīr liye baiThā huuñ

na.ī tahzīb ke ḳhākoñ ko sañvārā ham ne
ham se aḳhlāq kī tasvīr banā.ī na ga.ī

ġham kī tasvīr banāne ko maiñ jab bhī baiThā
un kī muskān ubhar aa.ī banā.ī na ga.ī

dost karte haiñ hasad is liye terī tasvīr
mā-sivā dil ke kahīñ aur sajā.ī na ga.ī

hairat-e-ishq meñ tasvīr se rafta hī rahe
aise jaate haiñ jo ham bhī to bhale jaate haiñ

mirī kahānī raqam huī hai havā ke aurāq-e-muntashir par
maiñ ḳhaak ke rañg-e-ġhair-fānī ko apnī tasvīr kar rahā huuñ

bahut nazdīk the tasvīr meñ ham
magar vo fāsla jo dikh rahā thā

ik tasavvur to hai tasvīr nahīñ
ḳhvāb hai ḳhvāb kī ta.abīr nahīñ

ye kis ne lā ke rakh dī sāmne tasvīr mahshar kī
abhī chauñke hī the ḳhvāb-e-pareshāñ dekhne vaale

ek tasvīr khīñch dī goyā
kaif-e-sahbā-e-arġhavānī kī

bashar ke jism meñ hai jaan māya-e-ġhaflat
so ai dīda-e-tasvīr kis ko ḳhvāb nahīñ

us aag ke sho.aloñ meñ vo phūloñ kā tabassum
ik sajda-e-be-misl kī tasvīr hai jānāñ

sūrat-e-vasl nikaltī kisī tadbīr ke saath
merī tasvīr hī khiñchtī tirī tasvīr ke saath

chup saadh ke baiThe the sabhī log vahāñ par
parde pe jo tasvīr thī kuchh bol rahī thī

ham vo tasvīr ḳhamoshī haiñ jise
ḳhud pe dīvār lagā detī hai