Tags-Tasweer

tasvīr us kī chāhiye har haal meñ mujhe
pāgal ho sar-phirī ho divānī hī kyuuñ na ho

āñkhoñ meñ hayā aa jaatī hai hoñToñ pe tabassum laate haiñ
vo mujh pe sitam jab karte haiñ tasvīr-e-karam ban jaate haiñ

muskurātī hai mirī āñkhoñ meñ aañsū dekh kar
kis qadar be-dard hai zālim tirī tasvīr bhī

mahv kar dī zehn se ġham ne tirī tasvīr bhī
donoñ dushman haiñ mirī taqdīr bhī tadbīr bhī

guftugū kī tum se aadat ho ga.ī hai varna meñ
jāntā huuñ baat kartī hai kahīñ tasvīr bhī

rañg bharte haiñ vafā kā jo tasavvur meñ tire
tujh se achchhī tirī tasvīr banā lete haiñ

sochtā huuñ tirī tasvīr dikhā duuñ us ko
raushnī ne kabhī saaya nahīñ dekhā apnā

maiñ jaisā thā mirī tasvīr meñ kal
tumheñ vaisā agar maiñ na milā to

tasvīr koī bantī dikhā.ī nahīñ detī
kiyā sarfa abas ham ne kiyā ḳhūn-e-jigar kā

kuchh bhī ho aap ke māhaul kā me.ār-e-hayāt
aap ke zehan meñ tasvīr hamārī hogī

ab to jis aañkh ko dekho vahī pathrā.ī huī
ab to jis chehre ko āvāz do tasvīr lage

husn utnā ek paikar maiñ simaT saktā nahīñ
tū bhī mere hī kisī ehsās kī tasvīr hai

ajab sadā ye numā.ish meñ kal sunā.ī dī
kisī ne sañg se tasvīr ko rihā.ī dī

farq itnā hai ki tū parde meñ aur maiñ be-hijāb
varna maiñ aks-e-mukammal huuñ tirī tasvīr kā

dil se nāzuk shai se kab tak ye harīfāna sulūk
dekh shīsha TuuTā jaatā hai tirī tasvīr kā

apnī sannā.ī kī tujh ko laaj bhī hai yā nahīñ
ai musavvir dekh rañg uḌne lagā tasvīr kā

vajūd-e-zan se hai tasvīr-e-kā.enāt meñ rañg
isī ke saaz se hai zindagī kā soz-e-darūñ

tum dil meñ ho yā tasvīr-e-hairat
tasvīr-e-hairat yā hai mirā dil

zikr thā rañg-o-bū kā aur dil meñ
terī tasvīr utartī jaatī thī

ye jo miltī hai tire ġham se ġham-e-dahr kī shakl
dil ne tasvīr se tasvīr utārī hogī