Tags-Tasweer

ḳhatm ḳhūn-e-dil huā kaise bhareñ rañg-e-vafā
kyā banā pā.eñge ham tasvīr-e-dilbar dekhnā

maiñ bhī ai surḳhi-e-be-nām tujhe pahchānūñ
tū hinā hai ki lahū paikar-e-tasvīr meñ aa

baḌī tasvīr laTkā dī hai apnī
jahāñ chhoTā sā ā.īna thā pahle

mire shu.ūr kī kam-mā.igī ki ai 'sādiq'
yaqīn bhī kabhī tasvīr-e-vahm hī sā lagā

mere kamre meñ koī aayā nahīñ ba.ad mire
gard-ālūd sī tasvīr se andāza huā

yuuñ rahā to saare manzar bad-numā ho jā.eñge
ik bhayānak rañg har tasvīr meñ bhar jā.egā

nazm ho yā ho ġhazal yā koī pyārī tasvīr
nasl-e-gauhar hī kī taḳhlīq nazar aatī hai

kyā jaane zamāne ne tasvīr meñ kyā dekhā
mujh ko to musavvir kī tasvīr nazar aa.ī

maiñ huuñ ḳhāmosh aur mire aage
terī tasvīr boltī sī hai

ek tasvīr-e-mohabbat hai javānī goyā
jis meñ rañgoñ ke evaz ḳhūn-e-jigar bharte haiñ

tasvīr ho terī jab dil meñ ġham dil ke qarīb aa.e kaise
maiñ yaad tujhe kar letā huuñ jab koī bhī uljhan huī hai

ab kisī jalva-e-rañgīñ se mujhe kaam nahīñ
un kī tasvīr mire dil meñ utar aa.ī hai

sāñsoñ ke ta.āqub meñ hairān milī duniyā
tasvīr bane jab ham ā.īna huī duniyā

sajāyā ham ne tasvīr-e-butāñ se ḳhāna-e-dil ko
magar bā.īñ hama us ghar kī vīrānī nahīñ jaatī

rañg tum bhī badalte ho pal pal
ḳhuub tasvīr ho zamāne kī

abhī dikhāo na tasvīr-e-zindagī is ko
ye bachpanā hai abhī muskurānā chāhtā hai

dil ke varaq-e-sāda pe kuchh rañg ubhāreñ
ḳhūñ-gashta tamannāoñ kī tasvīr utāreñ

ḳhud hī tasvīr banātā huuñ miTā detā huuñ
but-garī mere liye but-shikanī ho jaise

dekhne vaale zamāne kā bhī haq hai mujh par
sab kī nazroñ se chhupā kar mirī tasvīr na dekh

partav-e-nūr bhī hai jauhar-e-tanvīr bhī hai
aa.ina bhī hai mirā dil tirī tasvīr bhī hai