Tags-Tasweer

tasvīr ke se taa.ir ḳhāmosh rahte haiñ ham
jī kuchh uchaT gayā hai ab naala o fuġhāñ se

tire jamāl kā partav aziiz hai lekin
tirī adā tirī tasvīr tak nahīñ pahuñchī

us se paiham guftugū kiije kabhī barham na ho
asl par bhārī hai pahlū aap kī tasvīr kā

nāma-e-gul meñ kisī shoḳh kī tahrīr kā rañg
dil-e-pur-ḳhūñ kī ubhartī huī tasvīr kā rañg

lagtā hai ka.ī rātoñ kā jaagā thā musavvir
tasvīr kī āñkhoñ se thakan jhāñk rahī hai

harf-e-be-matlab kī maiñ ne kis qadar tafsīr kī
shakl pahchānī ga.ī phir bhī na is tasvīr kī

koī tirī tasvīr banā kar lā na sakā ḳhūn-e-dil se
lagtī hai har roz numā.ish yuuñ to na.e bahzādoñ kī

mujh se ranjish hai to maidān meñ aa jā.iye aap
merī tasvīr ke TukḌe na bahattar kiije

kuchh to is dil ko sazā dī jaa.e
us kī tasvīr haTā dī jaa.e

ġhaur se dekh koī hai pas-e-tasvīr-e-ḳhizāñ
varna kis samt ga.e rañg jamāne vaale

phir usī shoḳh kī tasvīr utar aa.ī hai
mire ash.ār meñ muzmar mirī rusvā.ī hai

yaar ma.alūm havā hai ki ḳhalā ḳhālī nahīñ
raat ā.īne meñ tasvīr bhī ho saktī hai

ḳhat ke purze aa.e haiñ qāsid kā sar tasvīr-e-ġhair
ye hai bhejā us sitamgar ne mire ḳhat kā javāb

ab lahū kā rañg gahrā hai mirī tasvīr meñ
aisā lagtā hai ki qissa muḳhtasar hone ko hai

raat ik ḳhvāb jo dekhā to huā ye mālūm
din bhī us ḳhvāb kī tasvīr banāne meñ gayā

kahne ko to maiñ bhuul gayā huuñ magar ai yaar
hai ḳhāna-e-dil meñ tirī tasvīr abhī tak

rakkhī thī tasvīr tumhārī āñkhoñ meñ
ham ne saarī raat guzārī āñkhoñ meñ

ishq meñ is ke savā maiñ kuchh nahīñ kar pā.ūñgā
hū-ba-hū jānāñ tirī tasvīr ho jā.ūñgā maiñ

maiñ kaise jiyūñ gar ye duniyā har aan na.ī tasvīr na ho
ye aate jaate rañg na hoñ aur lafzoñ kī tanvīr na ho

maiñ ne jitne bhī savāloñ meñ use dekhā hai
zindagī dard kī tasvīr nazar aa.ī hai