Tags-Awaz

mohabbat soz bhī hai saaz bhī hai
ḳhamoshī bhī hai ye āvāz bhī hai

maiñ apnī hī āvāz apne hī saa.e se Darne lagā huuñ
aur ab ḳhauf ye hai ki mere yahī Dar mujhe maar deñge

hai vo āvāz-e-shikast-e-dil-e-gītī jis ko
jaras-e-qāfila-e-umr-e-ravāñ kahtā huuñ

hamāre dil se uThī hausla-shikan āvāz
magar ye paañv kī zanjīr tak nahīñ pahuñchī

abhī hai gosh bar-āvāz ghar kā sannāTā
abhī koshish hai baḌī duur kī sadāoñ meñ

mirī āvāz sun kar zindagī bedār ho jaise
tirī āvāz kā saaya ufuq ke paar ho jaise

jis kī āvāz kānoñ meñ sub.h sub.h chiḌiyoñ kī tarah chahaktī thī
jis kī maujūdgī se fazāoñ meñ ḳhushbū sī mahaktī thī

phir mujhe āvāz dī ik shaḳhs ne
phir maiñ Thahrā us galī meñ der tak

āvāz de rahā hai mujhe kaun baar baar
kis ke liye rukā huuñ mujhe kuchh nahīñ patā

bulbuloñ se nahīñ gulzār-e-zamāna ḳhālī
shukr hai yaañ bhī ham-āvāz nazar aate haiñ

lutf aa.e jo shab-e-vasl mo.azzin so jaa.e
kyūñki vo gosh-bar-āvāz nazar aate haiñ

ye kyā tilism hai ki ubharne ke shauq meñ
āvāz dab ga.ī hai nikalne ke naam par

mañjdhār meñ naav Duub ga.ī to maujoñ se āvāz aa.ī
dariyā-e-mohabbat se 'kausar' yuuñ paar utārā karte haiñ

ek āvāz sī aatī hai ajab kānoñ meñ
shahr ab der tak ābād nahīñ rah sakte

yahī majbūr yahī mohr-ba-lab be-āvāz
pūchhne par kabhī aa.eñ to ġhazab pūchhte haiñ

sitāre dard kī āvāz se ġhāfil nahīñ rahte
dam-e-āhū se raushan mish.aleñ reg-e-bayābāñ kī

shauq-e-manzil hī liye uTh ga.e jaane vaale
āshnā ek na āvāz-e-darā kā niklā

ek āvāz girtī hai
zamīn par

tum ne to chhoḌā hī thā ai hamrahān-e-qāfila
lekin āvāz-e-jaras ham ko jagā kar le ga.ī

lambī ḳhāmoshī kī sāzish ko harā.e koī
merī āvāz meñ āvāz milā.e koī