Tags-Awaz

dil kī āvāz pe bai.at bhī to ho saktī hai
tum agar chāho mohabbat bhī to ho saktī hai

lamhāt kā hayūlā kuchh bhūlne lagā thā
āvāz kā sarāpā kuchh ūñghne lagā thā

mere sukūt ko mirī āvāz mat samajh
is pairahan meñ tere sitam kī sadā huuñ maiñ

apnī āvāz hī se ḳhauf-zada
shāḳh-dar-shāḳh kāñpte patte

ek be-rañg se ġhubār meñ huuñ
terī āvāz ke hisār meñ huuñ

aatī hai sisakne kī dil-e-dasht se āvāz
shāyad ki rag-o-pai meñ koī ābla-pā hai

āvāz meñ āvāz milāte hī rahe ham
rotī hī rahī ruuh so gaate hī rahe ham

sāya-e-chashm meñ hairāñ ruḳh-e-raushan kā jamāl
surḳhī-e-lab meñ pareshāñ tirī āvāz kā rañg

jab bhī aayā hai kisī ko bhuul jaane kā ḳhayāl
yak-ba-yak āvāz aa.ī lījiye ham aa ga.e

dil meñ ab āvāz kahāñ hai
TuuT gayā to saaz kahāñ hai

jis taraf chāhūñ pahuñch jā.ūñ masāfat kaisī
maiñ to āvāz huuñ āvāz kī hijrat kaisī

tujhe jaate samay itnā pukārā
mirī āvāz zaḳhmī ho ga.ī thī

rāt-bhar vo apne bistar par paḌā rotā rahā
duur ik āvāz banjar ho ga.ī shahnā.ī meñ

yuuñ aatī haiñ ab mere tanaffus kī sadā.eñ
jis tarah se detā hai koī nauhagar āvāz

mirī har saañs ko sab naġhma-e-mahfil samajhte haiñ
magar ahl-e-dil āvāz-e-shikast-e-dil samajhte haiñ

raat kī tārīkiyāñ pahchān letī thiiñ use
ruuh kī āvāz thā vo jism kā saaya na thā

maiñ us ko har roz bas yahī ek jhuuT sunñe ko phone kartā
suno yahāñ koī mas.ala hai tumhārī āvāz kaT rahī hai

zabāñ tum kaaT lo yā phir lagā do hoñTh par taale
mirī āvāz par koī bhī pahra ho nahīñ saktā

kārvāñ rad huā aur chup huī āvāz-e-jaras
kyā ab us samt ko tā-hadd-e-nazar jā.egā tū

chale chalte the rah-rav ek āvāz-e-aḳhī par
junūñ thā yā fusūñ thā kuchh to thā jo ho rahā thā