Tags-Awaz

insāniyat ke dard kī āvāz ban sake
soz-e-navā se sīñchiye zaḳhm-e-ḳhayāl ko

sunte hī us āvāz kī kuchh ho ga.ī vahshat
dekho to vo zanjīr kī jhankār kahāñ hai

naala aatā nahīñ kan-ras hai faqat ai bulbul
mard-e-sayyāh huuñ sun kar tirī āvāz aayā

chāñd ko tum āvāz to de lo
ek musāfir tanhā to hai

ek hī āvāz par vāpas palaT ā.eñge log
tujh ko phir apne gharoñ meñ DhūñDne jā.eñge log

vo apne aks ko āvāz de ke kahte haiñ
tirā javāb to maiñ huuñ mirā javāb nahīñ

āfiyat DhūñDne nikle the ḳhamoshī meñ 'nadīm'
ghir ga.e apnī hī āvāz kī tuġhyānī meñ

bar-sar-e-bād huā apnā Thikānā sar-e-rāh
kaam aayā mirā āvāz lagānā sar-e-rāh

girā hai shāḳh-e-gul se ek pata
kisī ne kyā mujhe āvāz dī hai

kaifiyat dil kī byaan karne ko
ek āvāz dil-figār hī dī

us kī āvāz meñ hai saat suroñ kā sañgīt
baat bhī vo kare to bajtī hai jhāñjhan jaisī

jāñ-gudāz itnī kahāñ āvāz-e-ūd-o-chañg hai
dil ke se nāloñ kā un pardoñ meñ kuchh āhañg hai

dhaḌak rahā thā mire har-nafas meñ dil un kā
sunī qarīb se āvāz duur kī maiñ ne

har-bun-e-mū gosh-bar-āvāz hai us ke liye
vo magar ḳhāmosh merī har sadā suntā huā

āvāz mere haq meñ ye kis ne uThā.ī hai
is bhiiḌ meñ ye kaun hai aadil mire liye

aaj hamāre saroñ par hai ye sūraj par kal ḳhaak meñ hogā
ham ne to bas āvāz lagā dī baaqī kaam avaam kareñge

yahī qabr-e-zuleḳhā siiñ hai āvāz
agar hai yūsuf-e-sānī yahī hai

koī ḳhushbū na koī rañg na koī āvāz
dil ko ham sañg na samjheñ to ise kyā likkheñ

paḌ gayā parda samā.at par tirī āvāz kā
ek aahaT kitne hañgāmoñ pe haavī ho ga.ī

tabhī bedār suunā manch be-sāmān-o-gumān
ik duur kī āvāz se gūñjā