Tags-Awaz

jab mohabbat ko sarāpā raaz honā chāhiye
kyuuñ shikast-e-dil kī phir āvāz honā chāhiye

ab un kī ḳhvāb-gāhoñ meñ koī āvāz mat karnā
bahut thak-hār kar fōtpath par mazdūr so.e haiñ

mire lab par zamāne kī shikāyat kis liye aa.ī
agar ye shor thā to us ko be-āvāz honā thā

sabhī ḳhāmosh the āvāz par us kī so aise meñ
mujhe chup to nahīñ rahnā thā ham-āvāz honā thā

ik pashemānī sī thī mujh ko mirī āvāz se
aur jab maiñ chup huā to ḳhāmushī chubhne lagī

merī taḳhlīq ko āvāz banā do 'māham'
merī tahrīr kī ḳhāmoshī miTā.e jaao

Dūbtī bujhtī huī āvāz huuñ
saath vaalo ġhaur se sunñā mujhe

lafz āvāz aur saa.e meñ
DhūñDhtā huuñ shabāhateñ kyā kyā

kaise chup-chāp chale aate haiñ nīñdoñ meñ mirī
maiñ ne ḳhvāboñ ko to āvāz lagā.ī hī nahīñ

diloñ ne umr bhar āvāz dī hai sīnoñ se
kisī ne jhūToñ bhī pūchhā nahīñ kabhī kyā hai

alfāz na the āvāz na thī naama bhī na thā qāsid bhī na thā
aise bhī ka.ī paiġhām ga.e aise bhī ka.ī paiġhām aa.e

maiñ apne aap meñ gum ho gayā huuñ
tirī āvāz kā jaadū bhī kyā hai

uñgliyāñ kānoñ meñ rakh kar ai musāfir sun zarā
aa rahī hai saaf āvāz-e-darā achchhī tarah

āvāz de rahe the jise be-ḳhudī meñ ham
dekhā to vo hameñ the koī dūsrā na thā

dard-e-dil pahle to vo sunte na the
ab ye kahte haiñ zarā āvāz se

ai rūh-e-asr jaag kahāñ so rahī hai tū
āvāz de rahe haiñ payambar salīb se

ham talvār uThā nahīñ paa.e
ham āvāz uThā sakte the

chup kī dīvāroñ se sar phoḌe hai
jo ik āvāz hai pāgal mujh meñ

koī āvāz hī de gum-shuda dil
kahāñ hai o mire yūsuf kahāñ hai

kaun ho saktā hai aane vaalā
ek āvāz sī aa.ī thī abhī