Tags-Tevar

dekhtā huuñ jo hashr ke āsār
apne tevar mulāhiza kiije

bhītar se ḳhālis jazbātī aur uupar se TheTh pitā
alag anūThā anbūjhā sā ik tevar the baabū jī

soch meñ bhī ab nahīñ pahlā sā tevar aur loch
shauq kī dīvār gard-e-ġham se uThtī jaa.e hai

ruk ke jo sāñseñ aa.iiñ ga.iiñ maanā ki vo aaheñ thiiñ lekin
aap ne tevar kyuuñ badle aahoñ meñ kisī kā naam nahīñ

ruḳh badal jaatā mirī taqdīr kā
aap hī tevar badal kar rah ga.e

kisī bhī taur na ḳhātir meñ lā.ūñgī tujh ko
mujhe na apne ye tevar dikhā pareshānī

bhauveñ chaḌhī haiñ aur hai tevar jhukā huā
kuchh aaj boltā hai vo ham se rukā huā

bahār aa.ī hai aur merī nigāheñ kaañp uTThīñ haiñ
yahī tevar the mausam ke jab ujḌā thā chaman apnā

ugte sūraj ko hī duniyāñ jhuk ke kartī hai salām
badle tevar pe zarā bhī mujh ko hairānī na thī

jashn bapā hai kuTiyāoñ meñ ūñche aivāñ kaañp rahe haiñ
mazdūroñ ke bigḌe tevar dekh ke sultāñ kaañp rahe haiñ

vo bhī kyā din the ki jab rahtī thiiñ nīchī nazreñ
chaar āñkheñ jo huiiñ phir ga.e tevar ham se

pahle ġham-e-furqat ke ye tevar to nahīñ the
rag rag meñ utartī huī tanhā.ī to ab hai

ham ko Thukrā ke kuchh aise tire tevar badle
jab sar-e-bazm bhī dekhā tujhe tanhā dekhā

koī to aisā maqām hogā jahāñ mujhe bhī sukūñ milegā
zamīñ ke tevar badal rahe haiñ to āsmāñ ko sañvār aa.uuñ

mehrbānoñ meñ tirā naam to likkhā hai magar
ḳhuub vāqif huuñ mirī jaan tire tevar se

lab ruḳhsār nigāheñ tevar hoñ jin ke hathiyār
un ko kab darkār hai ḳhanjar neze aur talvār

pahle bhī kar chukī hai mirā āshiyāñ tabāh
tevar phir aaj apne dikhāne lagī havā

tum mirī aañkh ke tevar na bhulā pāoge
an-kahī baat ko samjhoge to yaad ā.ūñgā

mizāj-e-shahr meñ tabdīliyāñ haiñ
mire tevar badalte dekh kar kyuuñ

mere tevar bujh ga.e merī nigāheñ jal ga.ī
ab koī ā.īna-rū ā.īna-dār aayā to kyā