Tags-Tevar

tevar chaḌhā ke pūchh rahe haiñ vo hāl-e-dil
rūdād-e-ġham to yaad hai lekin sunā.e kaun

tevar tire ai rashk-e-qamar dekh rahe haiñ
ham shaam se āsār-e-sahar dekh rahe haiñ

ḳhayāl kar kar bhaTak rahā huuñ nazar jo aa.e tevar haiñ bāñke
banāo bantā nahīñ hai 'nājī' jo us sajan ko lagā.ūñ chhatiyāñ

āñdhī kā kar ḳhayāl na tevar havā ke dekh
dīvār ret kī sahī ūñchī uThā ke dekh

un ke aate hī badal jaate haiñ tere tevar
ai safī' chāhiye insān kī niyyat achchhī

charāġh dil kā muqābil havā ke rakhte haiñ
har ek haal meñ tevar balā ke rakhte haiñ

kohsāroñ pe barf jab se pighlī
dariyā tevar badal rahe haiñ

vo uTThe haiñ tevar badalte hue
chalo dekheñ talvār chalte hue

ravish badal ga.ī tevar tere nahīñ badle
qayāmat aa.ī magar inqilāb ho na sakā

ġhunche ġhunche ke tevar gulsitāñ meñ badle haiñ
ham chaman meñ rah kar haiñ be-chaman na jaane kyuuñ

aaj tahzīb ke tevar bhī haiñ caroñ jaise
dafan ho jaa.e na kal apne hī ambāroñ meñ

nikal hī jaa.e na dam apnā āh-e-sozāñ se
zabāñ pe lafz to rakh is tarah na tevar khīñch

dekhe haiñ tere tevar dhokā na khā.eñge ab
uThte the valvale kuchh ham ne dabā diye haiñ

yūñhī va.ada par jo jhūTe to nahīñ milāte tevar
ai lo aur bhī tamāshā ye suno javāb ulTā

ham ne dast-e-duniyā par phir bhī kī nahīñ bai.at
jānte the ham tevar haiñ ḳharāb duniyā ke

na koī nāra-e-tahsīñ-numā na dād-e-suḳhan
ki sunñe vaale bhī tevar ġhazal ke dekhte haiñ

tū magar aa.ī to ik lamhe meñ
na vo tevar the na vo aaheñ thiiñ

agar havāoñ ke ruḳh mehrbāñ nahīñ hote
to bujhtī aag ke tevar javāñ nahīñ hote

kabhī mīThī nigāheñ haiñ kabhī tevar badalte haiñ
na martā huuñ na jiitā huuñ ye hai ta.azīr kī sūrat

tire tevar badalte hī zamāna ho gayā dushman
hilāl-e-īd bhī zāhir huā shamshīr kī sūrat